اسلام آباد: وزیراعظم نواز شریف نے جمعرات کے روز کہا کہ پاکستان ہندوستان کے ساتھ تمام معاملات پر بامقصد مذاکرات چاہتا ہے۔

نواز شریف نے سارک سربراہ کانفرنس میں شرکت کے بعد وطن واپسی پر طیارےمیں میڈیا سے گفتگو کرتے ہوئے کہا ہے کہ عالمی برادری بھی دونوں ممالک کے درمیان مذاکرات کی خواہشمند ہے۔

انہوں نے کہا کہ انڈیا سے کشمیر سمیت تمام معاملات پر بامقصد بات چیت ہونی چاہئے جبکہ ملک کی عزت، وقار اور احترام پر حرف نہیں آنے دیں گے۔

وطن واپسی پر وزیراعظم نے کہا کہ دھرنے ملکی ترقی کا راستہ نہیں روک سکتے، دھرنے والے نیا خیبرپختونخوا نہیں بنا سکے بلکہ ملک تباہ کرنے کے درپے ہیں۔

انہوں نے کہا کہ دھرنوں کا مقصد ملک کو اندھیروں اور پستی کی طرف لے جانا ہے، عوام نے عمران خان کو دھرنوں کے لیے ووٹ نہیں دیے اور کہا کہ عمران خان کا ایجنڈا ذاتی ہے، قومی نہیں۔

وزیراعظم نواز شریف نے کہا کہ دھرنے والے ملک کو کمزور اور عدم استحکام سے دوچار کرنا چاہتے ہیں۔

ان کا مزید کہنا تھا کہ خیبرپختونخوا میں انسداد پولیو مہم کے دوران رضاکار مارے جارہے ہیں جبکہ صوبے میں خطرناک مجرم جیلیں توڑ کر فرار ہورہے ہیں۔