کرکٹ کی معروف ویب سائٹ کرک انفو کی رپورٹ کے مطابق آئی سی سی کی جانب سے قوانین میں تبدیلی کے بعد پابندی کا شکار فاسٹ باؤلر محمد عامر کی آئندہ ماہ کرکٹ میں واپسی ہوسکتی ہے۔

آئی سی سی کے ایگزیکٹو بورڈ کا اجلاس اتوار کو دبئی میں ہوگا جس میں انٹی کرپشن کوڈ کی ترامیم کے باعث محمدعامر کو ڈومسیٹک کرکٹ کھیلنے کی اجازت مل سکتی ہے۔

آئی سی سی کے نومبر میں ہونے والے اجلاس میں اینٹی کرپشن کوڈ میں ترمیم کی گئی تھی جسکے مطابق پابندی کے شکار کھلاڑیوں کو پابندی ختم ہونے سے چھ ماہ قبل ڈومیسٹک کرکٹ کھیل پائیں گے۔

پی سی بی ترجمان آغا اکبر نے بھی عامر کی کرکٹ میں ممکنہ واپسی کی تصدیق کی ہے۔

خبر رساں ادارے اے ایف پی کی رپورٹ کے مطابق انہوں نے کہا کہ اس بات کے امکانات بہت روشن ہیں کہ عامر کو ڈومیسٹک کرکٹ کھیلنے کی اجازت مل جائے گی۔

عامر اور آصف کے ساتھ ساتھ اس وقت کے قومی ٹیم کے سلمان بٹ پر چار سال قبل دورہ انگلینڈ کے دوران لارڈز ٹیسٹ میں الزام عائد کیا گیا تھا انہوں نے جان بوجھ کر پیسوں کے لیے نوبال کیں۔

مزید پڑھیں: عامر کی کرکٹ میں واپسی کے امکانات روشن

آئی سی سی نے 2011 میں ان پر پابندی عائد کردی تھی لیکن پابندی لگانے والے ج نے اس قانون پر تحفظات کا اظہار کرتے ہوئے آئی سی سی سے اس پر نظرثانی کا مطالبہ کیا تھا۔

اسپاٹ فکسنگ الزامات ثابت ہونے پر عامر پر پانچ سال، سلمان بٹ پر دس سال اور آصف پر سات سال پابندی لگائی گئی تھی جبکہ تینوں کو جیل کی ہوا بھی کھانی پڑی تھی۔

عامر کی پابندی رواں سال اگست میں ختم ہورہی ہے۔