لاہور:پاکستان تحریک انصاف عمران خان نے کہا ہے کہ حریف سیاست دان ان سے مقابلے کیلئے اسٹیبلشمنٹ کی حمایت یا پھر 'غیر قانونی' طریقوں سے کمائے جانے والے پیسوں پر انحصار کرتے ہیں۔

'میرا مقابلہ ان سیاست دانوں سے ہے جو اسٹیبلشمنٹ کی حمایت پر کھیلتے ہیں یا پھر اقتدار میں آنے کیلئے پیسوں کی طاقت استعمال کرتے ہیں'۔

'تاہم، انہیں یہ معلوم نہیں کہ ان کا مقابلہ میرے جیسے ایک کھلاڑی سے ہے، جو کبھی بھی کسی مرحلہ پر تھکتا نہیں اور شکست نہیں مانتا'۔

انہوں نے ہفتہ کو پی ٹی آئی کے کھیل اور ثقافتی ونگ کی منعقدہ تقریب سے وڈیو لنک کے ذریعے گفتگو میں کہا کہ بد عنوان سیاست دانوں کو سمجھ لینا چاہیئے کہ کبھی نہ ہار ماننے والا ایک 'چیمپئن' ہمیشہ اپنی غلطیوں سے سیکھتا ہے ۔

ان کا کہنا تھا کہ ایک کھلاڑی اپنی تربیت اور مہارت کی وجہ سے آخری سانس تک چیلنجوں کا سامنا کرنے کا حوصلہ رکھتا ہے، جبکہ سیاست دان کے اندر یہ صلاحیت نہیں۔

'ایسے میں پی ٹی آئی واحد جماعت ہے جو ملک میں تباہی کا سبب بنے والی تمام خرابیوں کو ختم کرتے ہوئے ایک کرپشن فری سسٹم متعارف کرائے گی'۔

انڈیا میں رائج جمہوری نظام کے حوالے سے انہوں نے کہا کہ پاکستان نے اس سسٹم کی یکسر مختلف تصویر پیش کی ہے۔

'کامیابی کی اہم ترین کنجی خود کو بدلنا ہے اور انڈیا اس کا ایک واضح ثبوت ہے، لہذا اگر ہم چاہتے ہیں کہ ملک ترقی کی راہ پر گامزن ہو تو پہلے ہمیں خود کو تبدیل کرنا پڑے گا'۔