کہتے ہیں جب ایک دَر بند ہوتا ہے تو سو دَر کھل جاتے ہیں۔ کترینہ کیف کے میک اپ آرٹسٹ سبھاش سنگھ کے معاملے میں یہ بات درست نظر آتی ہے۔

کترینہ نے حال ہی میں سبھاش کو ایک شوٹنگ میں دیر سے آنے پر چلتا کر دیا۔

گیارہ سال تک کترینہ کا میک آرٹسٹ رہنے والے سبھاش کو کچھ دنوں تک کام نہ ملا تو انہیں اپنا پروفیشن بدلنے پر غور کرنے کا موقع ملا۔

سبھاش نے اب پروڈیوسر بنتے ہوئے ایک ہندی فلم بنانے کا فیصلہ کیا ہے، جس کے ہدایت کار مراٹھی فلمساز جیانتھ گلاٹر ہوں گے۔

فلم کی عکس بندی اگلے مہینے شروع ہوگی اور اس کا موضوع فلمی صنعت میں کام کرنے والے افراد کے مسائل پر مبنی ہوگا۔

سبھاش کے مطابق، فلم کے لیے جوہی چاؤلہ، شبانہ عظمی، دیویا دتہ اور انوپم کھیر کو سائن کر لیا گیا جبکہ ایک خصوصی کردار کےلیےایک 'سٹار اداکار' سے بات چیت بھی جاری ہے۔

جب سبھاش سے پوچھا گیا کہ آیا وہ سٹار رنبیر کپور تو نہیں ؟ اس پر انہوں نے کہا 'ضرورت پڑنے پر ان سے بھی رابطہ کیا جا سکتا ہے اور مجھے یقین ہے کہ وہ انکار نہیں کریں گے'۔

اور کترینہ کے بارے میں کیا خیال ہے؟ اس سوال کے جواب میں سبھاش نے خاموش رہنا ہی بہتر سمجھا۔

بشکریہ ہندوستان ٹائمز