فواد خان، چھوٹے نواب کی جگہ 'مسٹر چالو' بنیں گے

اپ ڈیٹ 28 فروری 2015
بائیں سے دائیں: پاکستانی اداکار فواد خان اور بولی ود اداکار سیف علی خان—۔
بائیں سے دائیں: پاکستانی اداکار فواد خان اور بولی ود اداکار سیف علی خان—۔

ایسا معلوم ہوتا ہے کہ پاکستانی اداکار فواد خان ایک مرتبہ پھر بولی وڈ پر اپنا جادو جگانے والے ہیں۔

ہندوستانی اخبارممبئی مرر کے مطابق اس حوالے سے خبریں گردش کر رہی ہیں کہ فلمساز ریما کگٹی کی نئی فلم 'مسٹر چالو' کے لیے فواد خان کو سائن کرلیا گیا ہے۔

واضح رہے کہ اس سے قبل اس فلم کے لیے چھوٹے نواب سیف علی خان کو منتخب کیا گیا تھا ، لیکن کچھ مصروفیات کی بناء پر ان کی جانب سے معذرت کے بعد فلمسازوں نے اِدھر اُدھر نظریں دوڑانی شروع کیں۔

ابتدائی طور پر شاہد کپور سے رابطہ کیا گیا لیکن وہ فی الوقت ابھیشیک چوبت کی 'اڑتا پنجاب' کی شوٹنگ میں مصروف ہیں۔

اور اب یہ افواہیں گردش کر رہی ہیں کہ 'مسٹرچالو' میں ایک عیاش اور خواتین کے دلدادہ مرد کا کردار نبھانے کے لیے فلمسازوں کی نظر انتخاب 'خوبصورت' اداکار فواد خان پر ٹہری ہے۔

مبئی مرر نے ذرائع کے حوالے سے بتایا ہے کہ اس حوالے سے فواد خان کے ساتھ معاہدہ اُسی وقت ہوگیا تھا جب وہ فلم فیئر ایوارڈ کے لیے ہندوستان میں موجود تھے اور جہاں انھوں نے بیسٹ ڈیبیو کا ایوارڈ حاصل کیا تھا۔

فلمساز ریما، فرحان اختر اور رتیش سدھوانی کو اس بات کا یقین ہے کہ فواد خان فلم میں ایک ایسے شخص کا کردار نہایت خوبی سے نبھائیں گے جو اپنی شخصیت کے سحر میں مبتلا کر کے خواتین کو متاثر کرتا ہے۔

ذرائع کا یہ بھی کہنا ہے کہ فواد خان کے لیے بھی یہ کردار ایک خوش آئند تبدیلی ثابت ہوگا۔

اس سے قبل فلم کی ہیروئن کے لیے کنگنا رناوٹ کو متخب کیا گیاتھا، تاہم وہ بھی اپنی دوسری فلم میں مصروفیت کے باعث اس کے لیے حامی نہ بھرسکیں۔

ذرائع کا یہ بھی کہنا ہے کہ کنگنا کی معذرت کے بعد ریما نے فلم کے اسکرپٹ میں کچھ تبدیلیاں کی ہیں اور خاتون اداکارہ کے مرکزی کردار کے لیے نام اسی ہفتے فائنل کرلیا جائے گا۔

فلم 'مسٹر چالو' کی شوٹنگ رواں برس اگست تک شروع ہونے کا امکان ہے ، اس فلم میں رچا چڈا اور پوجا بھٹ بھی اہم کرادار ادا کر رہی ہیں۔

ضرور پڑھیں

تبصرے (0) بند ہیں