سماجی رابطے کی ویب سائٹ کا کون سا صارف ہے جو کینڈی کرش نامی گیم سے واقف نہ ہو؟ درحقیقت اسے تو مقبول ترین آن لائن گیم ہونے کا اعزاز بھی حاصل ہے مگر کئی بار اس کا جنون جان لیوا بھی ثابت ہوسکتا ہے۔

جی ہاں سننے میں دلچسپ مگر حقیقت میں یہ سنگین واقعہ آئرلینڈ میں پیش آیا جہاں ایک خاتون کو کینڈی کرش کھیلنے کی 'سزا' ٹانگوں پر گولیاں کھا کر چکانا پڑی۔

بلفاسٹ کی رہائشی 47 سالہ خاتون کو اتوار کی شب گھر کے باہر حملہ آوروں نے صرف اس لیے فائرنگ کرکے زخمی کردیا تھا کہ وہ کینڈی کرش پر بہت زیادہ گزارشات یا ریکوئسٹس ارسال کرتی ہے۔

خاتون کی اس عادت سے تنگ نامعلوم حملہ آوروں نے اسے سزا دینے کا فیصلہ کیا اور ٹانگوں پر فائرنگ کرکے زخمی کردیا۔

آئرلینڈ میں اس طرح کے حملوں کی شرح میں اضافہ دیکھنے میں آرہا ہے اور ایک سال کے دوران اس طرح کے " سزا" کے 81 حملے ریکارڈ ہوئے ہیں۔