فاسٹ اینڈ فیوریس 7 کے ریلیز ہونے کے ساتھ ساتھ فیوریس 7 کی کاسٹ نے پال واکر کو اس فلم کے ذریعے منفرد خراج تحسین پیش کیا ہے۔

یاد رہے کہ پال واکر 2013 میں فلم کی شوٹنگ کے دوران ہی ایک حادثے میں جاں بحق ہوگئے تھے اور ان کی موت کے بعد فلم کے ہدایت کار اس بات پر پریشان تھے کہ ان کے بغیر اب اس فلم کو مکمل کیسے کیا جائے لیکن آخر میں یہی فیصلہ کیا گیا کہ اس فلم کو ضرور مکمل کیا جائے گا کیوں کہ یہ پال واکر کی آخری فلم ہے۔

اس فلم سیریز میں پال واکر کا نام برائن او کونر تھا اور اولین حصے میں انکا کردار ایک خفیہ پولیس اہلکار کا تھا جو بعد میں ایک برا لڑکا بن جاتا ہے۔

اب تک اس فلم سیریز کے چھ حصوں نے 2 ارب 30 کروڑ ڈالرز کا بزنس کیا ہے۔

پال واکر کی حادثے میں موت کے بعد اس فلم کی کہانی میں بھی کافی تبدیلیاں کی گئیں جبکہ فلم میں پال والکر کی جگہ ان کے بھائی نے اداکاری کی ہے۔

فیوریس 7 اس فلم سیریز میں پال واکر کے کردار کی آخری قسط ہے جبکہ اس فلم کو پہلی بار جیمز وان نے ہدایت کیا ہے۔ اس سے قبل فاسٹ اینڈ فیوریس کی تمام فلمیں جسٹن لن نے ڈائریکٹ کی تھیں جو پال واکر کی موت کے بعد فاسٹ اینڈ فیوریس کی کاسٹ سے علیحدہ ہوگئے۔

اب دیکھنا یہ ہے کہ یہ فلم پال واکر کے بغیر کیسے مکمل کی گئی ہے اور لوگ پال واکر کے بغیر اس فلم کو کس حد تک پسند کرینگے، تاہم ون ڈیزل تو اس کی کامیابی کے لیے پرامید ہیں اور انہیں توقع ہے کہ یہ بہترین فلم کا آسکر ایوارڈ جیتے گی۔