لاہور: پاکستان کرکٹ بورڈ (پی سی بی) کے سربراہ شہریارخان نے مئی میں زمبابوے ٹیم کی پاکستان دورے کی تصدیق کر دی۔

پیر کو یہاں پی سی بی گورننگ بورڈ کے اجلاس کے بعد شہریار نے میڈیا بریفنگ میں بتایا کہ زمبابوے مئی کے اواخر میں ایک ہفتے کے لیے یہاں آئے گی اور ان کی سیکیورٹی ٹیم جلد ہی پاکستان آئے گی۔

چیئرمین پی سی بی نے بتایا کہ زمبابوے کو کراچی میں کھیلنے پر کچھ تحفظات ہیں لیکن کوشش ہے کہ مہمان ٹیم کراچی اور لاہورمیں میچ کھیلے۔

’کوشش ہے کہ زمبابوے کا میچ ڈیفنس کے ساؤتھ اینڈ کلب میں ہو کیونکہ نیشنل اسٹیڈیم سے ہوٹل بہت دور ہے اور یہی وجہ ہے کہ ہم نے آئی سی سی سی ساؤتھ اینڈ کلب کو ٹیسٹ اسٹیٹس دینے کا مطالبہ کیا ہے‘۔

چیئرمین نے مزید بتایا کہ آسٹریلین آرمی کرکٹ ٹیم آئندہ ہفتے جبکہ بنگلہ دیش کی ویمن ٹیم بھی جلد آئے گی۔’ہم نے بہت سے ممالک کو پاکستان آنے کی دعوت دی ہے‘۔

ان کا کہنا تھا کہ انڈین کرکٹ بورڈ نے دسمبر میں ہونے والی سیریز حکومتی اجازت سے مشروط کی ہے۔

قومی ٹیم کی موجودہ پرفارمنس کے حوالے سے شہریار خان نے کہا کہ پاکستان کی کارکردگی دیکھ کر مایوسی ہوئی لیکن ہار کے باوجود وہ ٹیم پر تنقید نہیں کریں گے۔

انہوں نے کہا کہ ہار کے باوجود نوجوان کھلاڑیوں کی کارکردگی کے صورت میں کچھ مثبت چیزیں سامنے آئی ہیں۔’ٹیم اور ہیڈ کوچ وقار یونس پر تنقید قبل از وقت ہے‘۔

ان کا کہنا تھا کہ نجم سیٹھی جون میں انٹرنیشنل کرکٹ کونسل(آئی سی سی) کے صدر بن جائیں گے لیکن سیٹھی کے دور صدارت کے بعد اس عہدے کے لیے ٹیسٹ کرکٹر ہونا لازمی شرط ہو گی۔

آئی سی سی اجلاس کے حوالے سے سوال پر چیئرمین پی سی بی نے بتایا کہ پاکستان اور زمبابوے نے اجلاس میں سری لنکن کرکٹ بورڈ کی حمایت کی لیکن بورڈ میں سیاسی مداخلت کے باعث آئی سی سی کے تمام اراکین نے سری لنکا کی اجلاس میں مخالفت کی۔

چیئرمین پی سی بی نے اس موقع پر خواتین کرکٹرز کے لیے ویلفیئرپالیسی کا بھی اعلان کیا۔