کراچی :متعدد کیسز میں پھنسے پیپلزپارٹی کے باغی رہنما اور سابق وزیر داخلہ سندھ ڈاکٹر ذوالفقار مرزا جلد پاکستان چھوڑ دیں گے۔

سینئر صحافی اور ڈان نیوز کے اینکر پرسن مبشر زیدی نے 'پروگرام دوسرا رخ' میں گفتگو کرتے ہوئے کہا کہ ڈاکٹر ذوالفقار مرزا اپنی اہلیہ فہمیدہ مرزا کے ساتھ کسی بھی وقت امریکا چلے جائیں گے۔

انہوں نے بتایا کہ گزشتہ جمعرات کو امریکی قونصلیٹ میں سابق صوبائی وزیر داخلہ کا انٹرویو تھا جہاں امریکا کے لئے ان کے ویزے سے متعلق تمام چیزیں تقریباً مکمل ہو چکیں ہیں اور جلد ہی وہ اپنی اہلیہ کے ہمراہ یہاں سے چلے جائیں گے۔

انہوں نے کہا کہ ذوالفقار مرزا ہر سال چھ مہینے کے بعد چائے کی پیالی میں طوفان لانے کی کوشش کرتے ہیں، اس سے پہلے تک وہ متحدہ قومی موومنٹ کے خلاف بول رہے تھے جسے پیپلزپارٹی برداشت کرتی رہی۔

ان کے بقول پی پی رہنما نے اب اپنی پارٹی کے خلاف بولنا شروع کردیا تھا جس کا رد عمل مقدمات کی صورت میں نظر آرہا ہے، کراچی میں پولیس کی کارروائیاں اور مرزا کے حامیوں پر تشدد اسی سلسلے کی کڑی ہے۔

واضح رہے کہ سابق صوبائی وزیر داخلہ سندھ پی پی کے شریک چیئرمین آصف علی زرداری اور ان کی بہن فریال تالپر پر بڑے پیمانے پر کرپشن اور قتل جیسے جرائم کے الزامات عائد کررہے ہیں، مرزا کے تابڑ توڑ حملوں کے بعد ان کے خلاف سات سے زائد مقدمات درج کیے جاچکے ہیں۔

خود پر درج مقدمات میں ضمانت کیلئے ذوالفقار مرزا ہفتہ کو انسداد دہشتگردی کی عدالت میں پیش ہوئے جہاں پولیس اور ان کے حامیوں کے درمیان آنکھ مچولی جاری رہی۔