بولی وڈ کی بہترین جوڑیوں کا ذکر ہو اور شاہ رخ و کاجول کا خیال ذہن میں نہ آئے ایسا ہو ہی نہیں سکتا جب ہی تو دنیا بھر میں پرستار دونوں اسٹارز کو طویل عرصے سے ساتھ دیکھنے کے منتظر تھے.

'مائی نیم از خان' کے 5 سال بعد یہ کامیاب جوڑی پھر ایک بار فلم ’دل والے‘ کے لیے اکھٹی ہوئی جس سے نہ صرف پرستار بلکہ وہ دونوں بھی بہت خوش ہیں۔

شاہ رخ خان نے اپنے جذبات کے اظہار کے لیے سماجی رابطے کی ویب سائٹ ٹوئٹر کا سہارا لیا۔

شاہ رخ کا کہنا تھا کہ ’کالی کالی آنکھیں‘ ہو، ’تیرے نینا‘ یا ’دل والے‘ کا گانا، کاجول ہر گانے میں جادو جگا دیتی ہیں۔

انڈیا ٹوڈے کے مطابق یہ دونوں اس وقت آئس لینڈ میں اپنی فلم کے لیے ایک رومانوی گانے کی شوٹنگ میں مصروف ہیں جس کی کوریوگرافر شاہ رخ خان کی بہترین دوست فرح خان ہیں۔

یاد رہے کہ فرح خان شاہ رخ اور کاجول کی کامیاب فلم ’دل والے دلہنیا لے جائیں گے‘ کے مقبول گانے ’رک جا او دل دیوانے‘ کی کوریوگرافر بھی تھیں۔

فرح نے بھی اس گانے کی کوریوگرافی کے حوالے سے ٹوئٹر پر اپنی خوشی کا اظہار کیا۔

اس گانے کی شوٹنگ کی ایک تصویر دونوں اداکاروں کے پرستار نے ٹوئٹر پر شئیر کی۔

روہت شیٹھی کی ہدایت میں بننے والی فلم ’دل والے‘ کی کاسٹ میں شاہ رخ خان اور کاجول کے ہمراہ ورن دھون، کریتی سنن، جانی لیور اور بومن ایرانی شامل ہیں۔

فلم ’دل والے‘ 18 دسمبر کو نمائش کے لیے پیش کی جائے گی۔

ضرور پڑھیں

تبصرے (0) بند ہیں