گوہاٹی: جنوبی ایشیائی گیمز میں لیانا کیتھرین سوان نے تیراکی میں 200میٹر کی ریس جیت کر پاکستان کو ایونٹ میں پہلے سونے کے تمغے کا حقدار بنا دیا۔

ڈاکٹر ذاکر حسین ایکویٹک کمپلیکس میں لیانا نے دو منٹ 48 سیکنڈز میں فاصلہ طے کر کے پاکستان کو پہلا طلائی تمغہ دیا جبکہ سری لنکا کی حسانتھی نگاویلا دوسرے اور بنگلہ دیش کی رومانہ اختر تیسرے نمبر پر رہیں۔

اس کے علاوہ پاکستان نے 400 میٹر فری اسٹائل میں بھی کانسی کا تمغہ جیتا۔

ادھر سائیکلنگ کے مقابلے میں پاکستان کی خاتون ایتھلیٹ صاحبہ بی بی نے 30 کلومیٹر کے انفرادی مقابلے میں 50:10.598منٹ میں طے کر تیسری پوزیشن حاصل کرکے کانسی کا تمغہ اپنے نام کیا۔

مردوں کے ویٹ لفٹنگ مقابلوں میں محمد بلال اور نادر نے فائنل میں رسائی حاصل کی لیکن شکست کے سبب وہ سونے کا تمغہ نہ جیت سکے۔ بلال کو 57 کلو گرام فری اسٹائل کیٹییگری میں ہندوستان کے رویندر جبکہ راجنیش نے نادر کو شکست دے کر سونے کا تمغہ جیتا۔

اس کے ساتھ ساتھ پاکستان کے عبداللہ غفور نے ویٹ لفٹنگ میں کانسی کا تمغہ حاصل کیا، ویٹ لفنٹگ میں سونے کا میڈل ہندوستان کے گروراجا اور سلور میڈل بنگلہ دیش کے میزان الرحمٰن نے حاصل کیا۔

پاکستان کے قومی ویٹ لفٹنگ چمپیئن غفور نے اس امید کا اظہار کیا تھا کہ وہ خاندانی روایت کے مطابق اپنی بہترین صلاحیتوں کو بروئے کار لاتے ہوئے پاکستان کی خدمت کریں گے۔

غفور کا خاندان پاکستان کا مشہور کھیلوں کا خاندان ہے، ان کے والد عبدالغفور نے 1970 میں برطانیہ میں منعقدہ دولت مشترکہ گیمز کے ویٹ لفٹنگ مقابلوں میں سلور میڈل حاصل کیا تھا۔ ان کے بڑے بھائی اشتیاق غفور بھی جنوبی اشیائی گیمز میں چار دفعہ سلور میڈل حاصل کرچکے ہیں۔