راولپنڈی: گرلز کالج کے قریب فائرنگ سے افراتفری
راولپنڈی: وقار النسا گرلز اسکول و کالج کے قریب پولیس اور چوروں کے درمیان فائرنگ کے تبادلے سے کالج کی طالبات میں افراتفری پھیل گئی۔
ڈان نیوز نے ریجنل پولیس آفیسر (آر پی او) فخر سلطان کا حوالہ دیتے ہوئے بتایا کہ فائرنگ کا واقعہ دہشت گردی کا نہیں تھا، بلکہ پولیس کی گاڑی کار چوروں کا تعاقب کررہی تھی اسی دوران چوروں نے کالج کے قریب پولیس پر فائرنگ کی۔
انہوں نے کہا کہ فائرنگ کی آوازیں سن کر کالج انتظامیہ نے پولیس کو اطلاع دی جبکی طالبات اور علاقے میں خوف و ہراس پھیل گیا، پولیس کی بھاری نفری نے جائے وقوع پر پہنچ کر معاملے کو کلیئر کرایا۔
فائرنگ کے باعث کالج میں افراتفری سے 6 طالبات خوفزدہ ہوکر بے ہوش بھی ہوئیں جبکہ قانون نافذ کرنے والے اداروں کے اہلکاروں نے کالج کی جامع تلاشی کے بعد اسے محفوظ قرار دیا۔
فائرنگ کی اطلاع ملتے ہی والدین بچوں کو اسکول لینے پہنچ گئے جبکہ علاقے کے دیگر اسکولوں میں بھی چھٹی دے دی گئی۔
پولیس کی جانب سے یہ نہیں بتایا گیا کہ جن افراد نے فائرنگ کی تھی ان کو گرفتار کیا جا سکا یا وہ فرار ہو گئے.
واضح رہے کہ تعلیمی اداروں میں دہشت گردی کے حالیہ واقعات کے بعد طلبہ اور والدین میں کافی خوف پایا جاتا ہے، جبکہ ممکنہ حملوں کے خطرے کے پیش نظر ملک بھر خصوصآ خیبر پختونخوا اور پنجاب کے تعلیمی اداروں میں سیکیورٹی سخت کردی گئی ہے.
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔
تبصرے (2) بند ہیں