10 ارب کا ہندسہ بہت بڑا ہوتا ہے اور اس صورت میں تو خاص طور پر جب فیس بک کو اس کے سب سے زیادہ پسندیدہ شعبے میں شکست کی صورت میں سامنے آئے۔

جی ہاں اسنیپ چیٹ کے صارفین روزانہ 10 ارب ویڈیوز دیکھ رہے ہیں اور اس طرح وہ فیس بک کو اس شعبے میں شکست دینے میں کامیاب ہوگئی ہے۔

دلچسپ بات یہ ہے کہ اسنیپ چیٹ کے متحرک صارفین کی تعداد 10 کروڑ سے کچھ زیادہ ہے تاہم ویڈیوز دیکھنے کے معاملے میں انہوں نے ایک ارب سے زائد فیس بک صارفین کو شکست دے دی ہے۔

فیس بک کو اس وقت صارفین کی ذاتی شیئرنگ میں کمی کا سامنا ہے چاہے وہ کوئی بھی چیز ہو یعنی اسٹیٹس اپ ڈیٹس، فوٹوز، نوٹس وغیرہ۔

اور ہاں فیس بک اس ایپ یعنی اسنیپ چیٹ کو اپنے لیے سب سے بڑا خطرہ تصور کرتی ہے جس کی وجہ گزشتہ ایک برس میں اس کی مقبولیت میں بے پناہ اضافہ ہے۔

ایک سال کے اندر اس کے صارفین کی جانب سے روزانہ ویڈیوز دیکھنے کی تعداد 2 ارب سے بڑھ کر 10 ارب تک جاپہنچی ہے جبکہ فیس بک نے آخری بار نومبر میں بتایا تھا کہ اس کے صارفین روزانہ 8 ارب ویڈیوز دیکھ رہے ہیں۔

اسنیپ چیٹ کے رنگارنگ فلٹرز کا فیچر ایسا ہے جو فیس بک خود بھی چاہتی ہے اور جو لوگ اس ایپ کو استعمال نہیں کرتے انہوں نے بھی ان فلٹرز کو دیکھا ضرور ہوگا۔

اسی طرح شیئر ہونے والی تصاویر غائب ہوجانے کے فیچر کے لیے بھی فیس بک نے کئی ایپس متعارف کرائیں تاہم اسنیپ چیٹ کی مقبولیت میں کمی نہیں آسکی۔

خیال رہے کہ 2013 میں مارک زکربرگ نے اسنیپ چیٹ کو 3 ارب ڈالرز کے عوض خریدنے کی کوشش کی تھی تاہم کامیابی حاصل نہ ہوسکی۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔