حفیظ باؤلنگ ایکشن کے ٹیسٹ کیلئے تیار

25 جولائ 2016
محمد حفیظ پر عائد پابندی کا خاتمہ 17 جولائی کو ہو گیا تھا۔ فائل فوٹو اے ایف پی
محمد حفیظ پر عائد پابندی کا خاتمہ 17 جولائی کو ہو گیا تھا۔ فائل فوٹو اے ایف پی

مشکوک باؤلنگ ایکشن کے سبب ایک سالہ پابندی کا شکار پاکستانی آل راؤنڈر محمد حفیظ پابندی کی مدت ختم ہونے کے بعد اپنے باؤلنگ ایکشن کا دوبارہ ٹیسٹ دینے کیلئے تیار ہیں۔

آئی سی سی کی جانب سے مشکوک باؤلنگ ایکشن کے حامل حفیظ پر ایک سالہ پابندی عائد کی گئی تھی جس کا خاتمہ رواں ماہ کے آغاز میں ہو گیا ہے اور اب وہ دوبارہ باؤلنگ ایکشن کا ٹیسٹ دینے کے اہل ہیں۔

حفیظ کا باؤلنگ ایکشن ایک سال میں دو مرتبہ مشکوک رپورٹ ہوا تھا جہاں ٹیسٹ کے دوران کے بازو میں مقررہ حد سے زیادہ خم آ رہا تھا اور اسی وجہ سے ان پر ایک سال کی پابندی عائد کردی گئی تھی۔

35 سالہ آل راؤنڈر اس وقت انگلینڈ کے دورے پر موجود پاکستانی ٹیم کا حصہ ہیں اور بیٹنگ میں بدترین فارم سے دوچار ہیں اور اسی وجہ سے ان کی ٹیم میں جگہ کو بھی خطرات لاحق ہو گئے ہیں۔

تاہم باؤلنگ ایکشن کلیئر ہونے کے بعد حفیظ ٹیم میں جگہ برقرار رکھنے میں یقیناً کامیاب رہیں گے کیونکہ اس صورت میں پاکستان کو ایک اضافی مستند اسپنر دستیاب ہو سکے گا۔

حفیظ کی پابندی کا خاتمہ 17 جولائی کو ہوا تھا اور پاکستان کو امید ہے کہ مانچسٹر میں دوسرے ٹیسٹ میچ کے اختتام پر لف بورو میں ہونے والے ٹیسٹ میں حفیظ کامیاب رہیں گے۔

قومی ٹیم کے منیجر انتخاب عالم نے کہا کہ لف بورو میں حفیظ کے باؤلنگ ایکشن کے ٹیسٹ کے حوالے سے حتمی فیصلہ آئندہ چند دنوں میں کیا جائے گا، وہ چونکہ ابھی کہنی کی انجری سے مکمل صحتیاب نہیں ہوئے لہٰذا انہیں باؤلنگ ایکشن پر مزید کام جاری رکھنے کی ہدایت کی گئی ہے۔

مزید پڑھیں: حفیظ کی باؤلنگ پر ایک سال کی پابندی

انہوں نے کہا کہ گزشتہ دو ہفتوں سے حفیظ اپنے باؤلنگ ایکشن پر نیٹ میں کام کر رہے ہیں اور وہ پراعتماد ہیں کہ آئندہ چند دنوں میں ٹیسٹ کیلئے خود کو پیش کر دیں گے۔

حفیظ کا بؤلنگ ایکشن پہلی مرتبہ چیمپیئنز لیگ 2014 میں لاہور لائنز کی نمائدنگی کرتے ہوئے رپورٹ ہوا تھا تاہم چیمپیئنز ٹرافی کے معاملات میں آئی سی سی کی مداخلت نہ ہونے کے سبب ان کے خلاف کوئی ایکشن نہیں لیا گیا۔

تاہم اسی سال نومبر میں نیوزی لینڈ کے خلاف ابو ظہبی میں کھیلے گئے ٹیسٹ میچ کے دوران باؤلنگ ایکشن مشکوک رپورٹ ہونے کے بعد حفیظ کو باؤلنگ سے روک دیا گیا تھا۔

حفیظ نے اپنے باؤلنگ ایکشن پر کام شروع کیا اور پھر ایکشن کلیئر کرانے میں کامیاب رہے لیکن جلد ہی ان کا ایکشن پھر رپورٹ ہو گیا۔

گزشتہ سال گال میں سری لنکا کے خلاف کھیلے گئے ٹیسٹ میچ کے دوران امپائرز نے محمد حفیظ کے باؤلنگ ایکشن کو مشکوک رپورٹ کیا اور وہ ٹیسٹ کلیئر کرنے میں ناکام رہے جس پر آئی سی سی نے ان پر ایک سال کی پابندی عائد کردی تھی۔

تبصرے (0) بند ہیں