لاہور: پاکستان کرکٹ بورڈ (پی سی بی) نے ویسٹ انڈیز کے خلاف ون ڈے سیریز کے لیے قومی اسکواڈ کا اعلان کر دیا، ون ڈے ٹیم میں اسد شفیق اور عمر اکمل کی واپسی ہوئی جبکہ فاسٹ بولر عمر گل کو ڈراپ کرکے سہیل خان کو موقع دیا گیا۔

پاکستان کرکٹ بورڈ (پی سی بی) کی جانب سے جاری پریس ریلیز کے مطابق چیف سلیکٹر انضمام الحق نے قومی سلیکشن کمیٹی، ٹیم منیجمنٹ اور کپتان اظہر علی سے مشاورت کے بعد متحدہ عرب امارات میں ویسٹ انڈیز کے خلاف تین ون ڈے میچوں کی سیریز کے لیے 16 رکنی قومی اسکواڈ کا اعلان کیا۔

یہ بھی پڑھیں: ویسٹ انڈیز کو دوسری شکست، سیریز پاکستان کے نام

ویسٹ انڈیز کے خلاف ون ڈے سیریز میں پاکستان کرکٹ ٹیم کی قیادت اظہر علی ہی کریں گے جبکہ وکٹ کیپر بیٹسمین سرفراز احمد نائب کپتان ہوں گے۔

پاکستان اور ویسٹ انڈیز کے درمیان ون ڈے سیریز کا پہلا میچ 30 ستمبر کو شارجہ، دوسرا ون ڈے 2 اکتوبر کو شارجہ اور تیسرا 5 اکتوبر کو ابوظہبی میں ہوگا۔

اعلان کردہ پاکستانی اسکواڈ ان کھلاڑیوں پر مشتمل ہے:

اظہر علی (کپتان)، شرجیل خان، بابر اعظم، اسد شفیق، شعیب ملک، سرفراز احمد، عمر اکمل، محمد نواز، محمد رضوان، عماد وسیم، یاسر شاہ، راحت علی، محمد عامر، وہاب ریاض، حسن علی اور سہیل خان۔

واضح رہے کہ ویسٹ انڈیز کے خلاف 3 میچوں کی ٹی ٹوئنٹی سیریز میں پاکستان 2 صفر کی فیصلہ کن برتری حاصل کرچکا ہے جبکہ تیسرا ٹی ٹوئنٹی میچ 27 ستمبر کو ابو ظہبی میں کھیلا جائے گا۔

تین ون ڈے میچز کے بعد ویسٹ انڈیز اور پاکستان کے درمیان تین ٹیسٹ میچز کی سیریز بھی کھیلی جائے گی جس کا پہلا میچ 13 اکتوبر سے دبئی میں شروع ہوگا۔