پاکستان کے بیشتر اسٹارز کی نظریں بولی وڈ میں کام کرنے پر مرکوز ہوتی ہیں تاہم گلوکارہ و اداکارہ کومل رضوی ان سے ایک قدم آگے ہیں۔

گلوکاری سے اداکاری کے شعبے میں آنے والی کومل رضوی نے حال ہی میں ایک ظہرانے کے دوران اعلان کیا تھا کہ وہ ایک ہولی وڈ فلم آفرین میں مرکزی کردار ادا کرنے والی ہیں۔

ڈان امیجز سے بات کرتے ہوئے کومل رضوی نے بتایا " میں یہ موقع ملنے پر بہت پرجوش ہوں، یہ پہلی بار ہے کہ کوئی پاکستانی کسی بین الاقوامی فلم میں مرکزی کردار ادا کررہا ہے، میں آئندہ چند روز میں ٹورنٹو روانہ ہوجاﺅں گی، میری پوری توجہ اچھا کام کرنے پر مرکوز ہوگی اور توقع ہے کہ میں پاکستانیوں کے سر فخر سے بلند کرسکوں گی"۔

انہوں نے مزید بتایا " فلم کا پیغام پاکستان کے حق میں اور دہشتگردی کے خلاف ہے"۔

اس فلم کی ہدایات کینیڈا سے تعلق رکھنے والے اشیش چنہ دیں گے اور اس کی شوٹنگ 2 اکتوبر سے شروع ہوگی۔