شارجہ: پاکستان نے ویسٹ انڈیز کو 3 میچوں کی ایک روزہ سیریز کے پہلے میچ میں باآسانی 111 رنز سے شکست دے کر سیریز میں 0-1 کی برتری حاصل کرلی۔

پاکستان کی جانب سے نوجوان بلے باز بابراعظم نے بہترین بلے بازی کا مظاہرہ کرتے ہوئے 8 چوکوں اور 3 چھکوں کی مدد سے 120 رنز بنائے اور پاکستان کو 284 رنز کا مجموعہ ترتیب میں بنیادی کردار ادا کیا۔

شرجیل خان نے ایک مرتبہ پھر ذمہ داری کا ثبوت دیا اور 54 رنز کی اننگز کے بعد جارحانہ کھیلنے کی کوشش میں آؤٹ ہوئے۔

ویسٹ انڈیز کے باؤلرز کپتان کے فیصلے کو درست ثابت کرنے میں ناکام ہوئے جس کے بعد بلے باز بھی ناکامی کا شکار ہوئے اور 175 بنا کر آؤٹ ہوئے، مارلن سیموئلز 46 رنز بنا کر سرفہرست رہے جبکہ سنیل نرائن نے 23 رنز بنا کر مزاحمت کی کوشش کی۔

پاکستان کی جانب سے محمد نواز نے سب سے زیادہ 4 وکٹیں حاصل کیں جبکہ نوجوان حسن علی نے 3 کھلاڑیوں کو آؤٹ کیا۔