'اصل امتحان آسٹریلیا اور نیوزی لینڈ'

اپ ڈیٹ 19 اکتوبر 2016
مکی آرتھر کا کہنا ہے کہ ٹیسٹ ٹیم کی کارکردگی تسلی بخش رہی ہے—فائل فوٹو: رائٹرز
مکی آرتھر کا کہنا ہے کہ ٹیسٹ ٹیم کی کارکردگی تسلی بخش رہی ہے—فائل فوٹو: رائٹرز

پاکستان کرکٹ ٹیم کے ہیڈ کوچ مکی آرتھر نے ویسٹ انڈیز کے خلاف سیریز کے دیگر میچوں میں ٹیم کی جانب سے بہترین کارکردگی کی امید کرتے ہوئے آسٹریلیا اور نیوزی لینڈ کے دورے کو اصل امتحان قرار دے دیا۔

ڈان نیوز سے گفتگو کرتے ہوئے مکی آرتھر کا کہنا تھا کہ 'مجھے پوری امید ہے کہ ٹیم اچھا کھیلے گی اور دوسرے ٹیسٹ میں اپنی کارکردگی کو بہتر کرے گی'۔

پاکستان ٹیم نے ویسٹ انڈیز کے خلاف پہلے ڈے اینڈ نائٹ ٹیسٹ کی پہلی اننگز میں شاندار بلےبازی کا مظاہرہ کرتے ہوئے 3 وکٹوں پر 579 رنز بنائے تھے تاہم دوسری اننگز میں پوری ٹیم صرف 123 رنز پر ڈھیر ہوگئی تھی۔

قومی ٹیم کے کوچ نے کہا کہ ٹیسٹ ٹیم کی کارکردگی حالیہ سیریز میں تسلی بخش رہی ہے۔

مزید پڑھیں: پاکستان ایشیاکے پہلے ڈے اینڈ نائٹ ٹیسٹ کافاتح

ان کا کہنا تھا کہ 'انگلینڈ میں ٹیم کی کارکردگی بڑی حوصلہ افزا تھی اور یہی جوش کئی سالوں تک طویل کیا جاسکتا ہے'۔

یاسر شاہ نے ٹیسٹ میں بہترین صلاحیتوں کا مظاہرہ کرتے ہوئے 17 میچوں میں اپنے کیریئر کی 100 وکٹیں مکمل کیں جو ایشیا کا ریکارڈ ہے جبکہ پاکستان کی جانب سے بھی تیز ترین 100 وکٹیں حاصل کرنے والے باؤلر بن گئے ہیں۔

لیگ اسپنر ٹیسٹ کرکٹ کی تاریخ میں تیز ترین 100 وکٹیں حاصل کرنے والوں کی فہرست میں مشترکہ طورپر دوسرے نمبر پر ہیں اور یہ ریکارڈ ٹیسٹ کی تاریخ میں 85 سال کے طویل عرصے بعد برابر ہوا ہے۔

#یہ بھی پڑھیں: لیگ اسپن کے فن کار یاسرشاہ کا ریکارڈ

مکی آرتھر نے یاسر شاہ کی تعریف کرتے ہوئے کہا کہ ' یاسر ایک غیرمعمولی باؤلر ہیں اور وہ مستقبل میں پاکستان کے چمپیئن باؤلر ہوں گے'۔

آرتھر کا کہنا تھا کہ 'آسٹریلیا اور نیوزی لینڈ کے خلاف آنے والے دورے ٹیم کے لیے حقیقی امتحان ہوں گے لیکن میں ٹیم کے ساتھ اس چیلنج سے نمٹنے کے لیے پرعزم ہوں'۔

پاکستان نے ویسٹ انڈیز کو سیریز کے پہلے ٹیسٹ میں ڈیرن براوو کی جرات مندانہ بلےبازی اور بشو کی تباہ کن باؤلنگ کے باوجود 56 رنز سے شکست دے کر سیریز میں 0-1 کی برتری حاصل کی ہے۔

سیریز کا دوسرا ٹیسٹ 21 اکتوبر کو ابوظہبی میں شروع ہوگا اور تیسرے ٹیسٹ کا آغاز 30 اکتوبر کو شارجہ میں ہوگا۔

تبصرے (0) بند ہیں