اسلام آباد کے پاکستان اسپورٹس کمپلیکس میں ایشیا اوشیانا گروپ 2 ڈیوس کپ کے آغاز کے ساتھ ہی طویل عرصے بعد پاکستان میں بین الاقوامی ٹینس مقابلوں کی واپسی ہوئی۔

پاکستان کے ٹاپ سیڈ کھلاڑی اعصام الحق اور عقیل خان نے ابتدائی میچوں میں شاندار فتح حاصل کی۔

ایرانی ٹیم نے دورے سے قبل سیکیورٹی خدشات کا اظہار کیا تھا تاہم انٹرنیشنل ٹینس فیڈریشن کی جانب سے ٹورنامنٹ کے پاکستان میں انعقاد کے اعلان کے بعد تمام خدشات دم توڑ گئے۔

عقیل خان نے پہلے میچ میں ایران کے شاہین خالدان کو اسٹریٹ سیٹس میں 7-6، 6-4 اور 6-2 سے شکست دی۔

دوسرے میچ میں پاکستان کے ٹاپ سیڈ اعصام الحق نے آسان مقابلے کے بعد ایران کے انوشہ شاغولی کے خلاف 6-1، 6-2 اور 6-2 سے فتح حاصل کی۔