عالمی نمبر2 جرمنی کی ٹینس اسٹار اینجلیق کربر کو دبئی چمپیئن شپ میں ایلینا سویٹلانا کے ہاتھوں شکست کا سامنا کرنا پڑا جس کے بعد انھوں نے درجہ بندی میں سرفہرست آنے کا موقع بھی گنوا دیا۔

بی بی سی کی رپورٹ کے مطابق یوکرینی اسٹار ایلینا سویٹلانا نے کربر کے خلاف لگاتار تیسری فتح حاصل کرتے ہوئے دبئی چمپیئن شپ کے سیمی فائنل میں 6-3 اور 7-6 سے زیر کرلیا۔

29 سالہ جرمن اسٹار اگر دبئی چمپیئن شپ کے ٹائٹل میں کامیابی حاصل کرلیتی تو وہ امریکا کی سرینا ولیمز سے پہلی پوزیشن چھین کر ایک مرتبہ پھر عالمی نمبر ایک بن جاتیں۔

کربر ستمبر 2016 میں پہلی پوزیشن حاصل کرنے والے معمر کھلاڑی بن گئی تھیں اور اس پوزیشن پر 20 ہفتوں تک براجمان رہیں۔

مزید پڑھیں: وینس ولیمز کو شکست،سرینا آسٹریلین اوپن کی چمپیئن

سویٹلانا اب فائنل میں کیرولین ووزنیاکی کے خلاف مدمقابل ہوں گی۔

خیال رہے کہ ووزنیاکی، دوہا اوپن کے فائنل میں کیرولین پلسکووا سے شکست کے بعد یہ لگاتار دوسرا فائنل کھیلیں گی۔

امریکا کی سرینا ولیمز نے سال کے پہلے گرینڈ سلیم آسٹریلین اوپن کے فائنل میں اپنی بہن وینس ولیمز کے خلاف کامیابی حاصل کرکے درجہ بندی میں پہلی پوزیشن دوبارہ حاصل کر لی تھی۔