مظفرآباد: صدر پاکستان ممنون حسین نے ہندوستان سے مقبوضہ کشمیر میں عوامی جذبات کو تسلیم کرنے اور وادی میں غیرقانونی قبضے کو ختم کرنے کا مطالبہ کردیا۔

قائداعظم محمد علی جناح کی پیدائش کے حوالے سے منعقدہ ایک تقریب سے خطاب کرتے ہوئے ممنون حسین کا کہنا تھا کہ 'بھارتی قابض افواج کشمیریوں کو کچلنے کے لیے ہر سفاک کوشش کرچکی ہیں، اس قدر سفاک کہ جو پیلٹ گنز جنگلی جانوروں کے شکار کے لیے استعمال ہوتی ہیں انہیں معصوم نہتے کشمیریوں پر استعمال کیا گیا'۔

یہ بھی پڑھیں: ہندوستان کا مسئلہ کشمیر پر مذاکرات سے انکار

ان کا مزید کہنا تھا کہ مقبوضہ کشمیر میں انسانی حقوق کی خلاف ورزیوں میں ہونے والا اضافہ اور جبر دنیا بھر کے ضمیر کو جھنجھوڑنے کے لیے کافی ہے۔

صدر ممنون حسین نے اس موقع پر بین الاقوامی برادری سے بھی مطالبہ کیا کہ وہ آگے بڑھیں اور کشمیریوں کو ان کے حق خودارادیت دلانے میں مدد کریں۔

مزید پڑھیں: 'مسئلہ کشمیر کا حل اقوام متحدہ کی اہم ذمہ داری'

انہوں نے خبردار کیا کہ اگر مسئلہ کشمیر کے حل کو مزید ملتوی کیا گیا تو اس کے نتیجے میں خطے کا امن شدید متاثر ہوسکتا ہے۔

یہ خبر 25 فروری 2017 کو ڈان اخبار میں شائع ہوئی۔