انضمام الحق کی سربراہی میں سلیکشن کمیٹی نے ویسٹ انڈیز کے دورے سے قبل ٹیم کی ٹریننگ کے لیے 31 کھلاڑیوں کے ناموں کا اعلان کردیا تھا جو قذافی اسٹیڈیم لاہور میں گزشتہ چند دنوں سے سرگرم ہیں۔

پاکستان ٹیم رواں ماہ ویسٹ انڈیز کے دورے پر روانہ ہوگی جہاں وہ 4 ٹی ٹوئنٹی میچوں کے علاوہ 3 ایک روزہ اور 3 ٹیسٹ میچ کھیلے گی۔

لاہور میں جاری تربیتی کیمپ کے لیے تجربہ کار وکٹ کیپر کامران اکمل کو بھی شامل کیا گیا ہے جبکہ دیگر کھلاڑیوں میں پی ایس ایل میں نمایاں کارکردگی کا مظاہرہ کرنے والے اسامہ میر، شاداب خان، محمد اصغر اور دیگر کھلاڑی شامل ہیں۔

خیال رہے کہ پاکستان کرکٹ بورڈ (پی سی بی) کے چیئرمین نے اپنے تازہ بیان میں کہا ہے کہ مستقبل میں کھلاڑیوں کی فٹنس کو بنیادی اہمیت دی جائے گی اور ان کھلاڑیوں کو ٹیم میں شامل نہیں کیا جائے گا جن کی فٹنس کم سے کم سطح پر ہوگی۔

دوسری جانب ہیڈ کوچ مکی آرتھر بھی کہہ چکے ہیں کہ ٹیم کی فٹنس کو بہتر کرنا اہم ہے باوجود اس کے کہ ٹیم کی فٹنس میں بہتری آئی ہے لیکن اب بھی ہم دنیا کی دیگر ٹیموں سے بہت پیچھے ہیں۔