ایران میں سیلاب کی تباہ کاریاں جاری ہیں جبکہ جاں بحق افراد کی تعداد 43 ہو گئی۔

فرانسیسی خبر رساں ادارے 'اے ایف پی' کے مطابق ایرانی حکومت کی ویب سائٹ پر شائع کیے گئے بیان میں صدر حسن روحانی کا کہنا تھا کہ ایران کے 31 میں سے 25 صوبے سیلاب کا شکار ہیں، ایسا شاید پہلے کبھی نہیں ہوا۔

انہوں نے ایران کے شمالی مشرقی صوبے گلستان میں سیلاب سے متاثرہ علاقوں کا دورہ کیا جہاں سرکاری اعداد و شمار کے مطابق صوبہ گلستان میں سیلاب سے جاں بحق افراد کی تعداد 10 ہوگئی ہے۔

دوسری جانب ایران کے جنوبی شہر شیراز میں ایک روزہ سوگ کا اعلان کیا گیا ہے، وہاں سیلاب کے نتیجے میں ایک سو زائد افراد زخمی اور 19 افراد جاں بحق ہوئے ہیں۔

تسنیم نیوز ایجنسی کے مطابق ایران کے 30 صوبوں میں امدادی کارروائیاں جاری ہیں ،اب تک 43 ہزار سے زائد افراد کو باحفاظت ریسکیو کیا گیا ہے جبکہ 27 ہزار افراد کع ایمرجنسی رہائش فراہم کی گئی ہے۔

حکام کے مطابق سیلاب کے نتیجے میں گھروں، فصلوں اور بنیادی انفراسٹرکچر کو کروڑوں ڈالر کا نقصان ہوا ہے۔

دوسری جانب ایران کے محکمہ موسمیات نے 2 روز بعد ملک بھر میں مزید بارشوں کی پیش گوئی کی ہے۔