صفاء الھاشم کے مطابق غیر ملکیوں پر بھاری ٹیکس نافذ کیا جائے
صفاء الھاشم کے مطابق غیر ملکیوں پر بھاری ٹیکس نافذ کیا جائے

پاکستان سمیت دنیا کے متعدد ممالک ایسے ہیں، جہاں کھانے پینے کی اشیاء سمیت سڑکیں استعمال کرنے پر بھی ٹیکس عائد ہے۔

تاہم مشرق وسطیٰ کے اہم ترین ملک کویت کی خاتون رکن اسمبلی نے مطالبہ کیا ہے کہ حکومت غیر ملکیوں پر سانس لینے پر بھی ٹیکس عائد کرے۔

کویت کی واحد خاتون رکن پارلیمنٹ 55 سالہ صفاء الھاشم نے حکومت سے پہلے بھی مطالبہ کیا تھا کہ ملک میں بسنے والے غیر ملکیوں پر راستے استعمال کرنے سمیت سانس کے لیے کویت کی ہوا استعمال کرنے پر بھی ٹیکس نافذ کیا جائے۔

مڈل ایسٹ مانیٹر کے مطابق صفاء الھاشم نے ایک مرتبہ پھر حکومت سے مطالبہ کیا کہ غیر ملکیوں پر ہر اس سہولت کے استعمال پر ٹیکس نافذ کیا جائے جو سہولت انہیں کویت میں حاصل ہے۔

کویت میں مقامی افراد سے زیادہ غیر ملکی رہتے ہیں—فوٹو: الامے اسٹاک
کویت میں مقامی افراد سے زیادہ غیر ملکی رہتے ہیں—فوٹو: الامے اسٹاک

ان کا کہنا تھا کہ انہوں نے غیر ملکیوں کی جانب سے اپنے وطن میں ترسیلات زر بھجوائے جانے پر بھی بھاری فیس عائد کرنے کی تجویز دی تھی لیکن اس پر بھی تاحال عمل نہیں ہوا۔

انہوں نے ایک مرتبہ پھر حکومتی وزرا سے مطالبہ کیا کہ وہ غیر ملکیوں پر ترسیلات زر بھجوائے جانے پر بھاری فیس عائد کرنے سمیت ان کی جانب سے سانس لینے پر بھی پابندی عائد کریں۔

صفاء الھاشم ملک میں غیر ملکیوں کے لیے مخالف جذبات کے حوالے سے مشہور ہیں، وہ ماضی میں حکومت سے غیر ملکیوں کی تعداد کم کرنے اور انہیں بے دخل کرنے کا مطالبہ بھی کر چکی ہے۔

کویتی حکومت کے اعداد و شمار کے مطابق ملک کی مجموعی آبادی کا 70 فیصد غیر ملکی ہے۔

کویت کے مقامی افراد کی تعداد 10 لاکھ سے زیادہ جبکہ غیر ملکیوں کی تعداد 30 لاکھ سے زیادہ ہے۔

صفاء الھاشم کویت کی واحد خاتون رکن اسمبلی ہیں —فوٹو: فیس بک
صفاء الھاشم کویت کی واحد خاتون رکن اسمبلی ہیں —فوٹو: فیس بک

تبصرے (1) بند ہیں

aftab alam Sep 17, 2019 04:51pm
Saans insaniyat ko qudrat ka tohfa hain. Kisi insan ko ye haq hasil k wo saans lene ho tax lagaye. Ye mukroha soch in ki pasti aur hawas ki entaha ko bayan karta hain.