وزیراعظم عمران خان عالمی اقتصادی فورم کے خصوصی سیشن سے خطاب کریں گے

اپ ڈیٹ 20 جنوری 2020
وزیراعظم ڈیووس میں خصوصی سیشن سے خطاب بھی کریں گے—فائل/فوٹو:اے ایف پی
وزیراعظم ڈیووس میں خصوصی سیشن سے خطاب بھی کریں گے—فائل/فوٹو:اے ایف پی

وزیر اعظم عمران خان سوئٹزرلینڈ کے شہر ڈیووس میں ہونے والے 'عالمی اقتصادی فورم' کے اجلاس میں شرکت کریں گے اور خصوصی سیشن سے خطاب بھی کریں گے۔

ترجمان دفتر خارجہ عائشہ فاروقی کی جانب سے جاری اعلامیے کے مطابق عالمی اقتصادی فورم کے بانی اور ایگزیکٹو چیئرمین کلاز شواب نے وزیر اعظم عمران خان کو عالمی اقتصادی فورم کے سالانہ اجلاس میں شرکت کی دعوت دی ہے۔

اعلامیے کے مطابق سوئٹزرلینڈ کے شہر ڈیووس میں عالمی اقتصادی فورم کا اجلاس 21 جنوری کو شروع ہوگا اور 23 جنوری تک جاری رہے گا۔

وزیراعظم عمران خان اس دورے کے دوران عالمی اقتصادی فورم کے خصوصی سیشن میں شریک ہوں گے اور پاکستان اسٹریٹجی ڈائیلاگ میں کارپوریٹ سیکٹر سے وابستہ نمائندوں سے تبادلہ خیال کریں گے۔

یہ بھی پڑھیں:خبردار کرتا ہوں! اقوام متحدہ کشمیریوں کو ان کا حق خود ارادیت دلائے، وزیراعظم

اجلاس کے دوران وزیراعظم عمران خان کئی عالمی رہنماؤں سے غیررسمی ملاقاتیں بھی کریں گے جن میں سے اہم امریکی صدر ڈونلڈ ٹرمپ بھی شامل ہیں، یہ جولائی 2019 کے بعد دونوں رہنماؤں کے درمیان تیسری ملاقات ہوگی۔

وزیر اعظم عمران خان ڈیووس میں فورم کے بین الاقوامی میڈیا کونسل کے سیشن میں عالمی میڈیا سے بھی گفتگو کریں گے۔

ترجمان دفتر خارجہ کے اعلامیے کے مطابق عالمی اقتصادی فورم کے 50 ویں سالگرہ کے موقع پر منعقد ہو نے والے رواں برس کے اجلاس کا موضوع ’اسٹیک ہولڈرز برائے مربوط و پائیدار دنیا‘ رکھا گیا ہے۔

فورم سے سیاسی رہنما، بزنس ایگزیکٹوز، بین الاقوامی اداروں کے سربراہان اور سول سوسائٹی کے نمائندے عصر حاضر کے اقتصادی، جیو پولیٹیکل، سماجی اور ماحولیاتی مسائل پر تبادلہ خیال کریں گے۔

اعلامیے کے مطابق وزیراعظم عمران خان پاکستان کے وژن اور معیشت، امن و استحکام، تجارت، بزنس اور سرمایہ کاری کے مواقع سے متعلق پاکستان کی کامیابیوں سے آگاہ کریں گے۔

عمران خان ڈیووس میں مقبوضہ جموں و کشمیر کی موجودہ صورت حال کو بھی اجاگر کریں گے اور اہم علاقائی اور بین الاقوامی امور پر پاکستان کے نکتہ نظر پر بھی روشنی ڈالیں گے۔

یاد رہے کہ وزیراعظم عمران خان نے 2018 میں وزارت عظمیٰ کا منصب سنبھالنے کے بعد گزشتہ برس 27 ستمبر کو اقوام متحدہ میں خطاب کیا تھا جہاں انہوں نے معیشت سمیت عالمی معاملات پر بات کی تھی اور مقبوضہ جموں و کشمیر کے مسئلے کو بھرپور انداز میں اٹھایا تھا۔

اقوام متحدہ کی جنرل اسمبلی کے 74ویں اجلاس سے خطاب کرتے ہوئے وزیراعظم عمران خان نے چار اہم معاملات موسمیاتی تبدیلی، اسلاموفوبیا، منی لانڈرنگ اور مقبوضہ جموں و کشمیر کی سنگین صورت حال پر گفتگو کی تھی۔

تبصرے (0) بند ہیں