سام سنگ کے نئے فلیگ شپ گلیکسی ایس 20 سیریز کے فونز اب پاکستان میں پری آرڈر میں دستیاب ہیں۔

سام سنگ نے یہ فونز 11 فروری کو سان فرانسسکو میں ایک ایونٹ کے دوران پیش کیے تھے۔

سام سنگ کے تینوں فونز پری آرڈر میں دستیاب ہیں، جن میں اس کمپنی کا پہلا 108 میگا پکسل کیمرے سے لیس فون گلیکسی ایس 20 الٹرا بھی شامل ہے۔

تینوں فونز کے 128 جی بی اسٹوریج والے ماڈل صارفین اس وقت بُک کرا سکتے ہیں۔

تینوں فونز میں آئی پی 68 ڈسٹ اور واٹر ریزیزٹنٹ صلاحیت دی گئی ہے یعنی اس فون کو ڈیڑھ میٹر گہرے پانی میں 30 منٹ تک رکھا جاسکتا ہے جبکہ تینوں میں ایچ ڈی آر پلس اور آل ویز آن ڈسپلے کورننگ گوریلا گلاس سکس کے ساتھ دیا گیا ہے۔

اور ہاں تینوں میں وائرلیس چارجنگ کے ساتھ ریورس وائرلیس چارجنگ سپورٹ موجود ہے جبکہ فنگر پرنٹ سنسر اسکرین کے اندر نصب ہے۔

قیمت اور دیگر تفصیلات سے قبل آپ ان فونز کی خصوصیات جان لیں۔

گلیکسی ایس 20

اسٹینڈرڈ گلیکسی ایس 20 میں 6.2 انچ کا کواڈ ایچ ڈی پلس او ایل ای ڈی ڈسپلے دیا گیا ہے جس میں ریفریش ریٹ 120 ہرٹز ہے۔

اس فون میں فائیو جی سپورٹ (سب 6)، اسنیپ ڈراگون 865 یا ایکسینوس 990، 12 جی بی ریم اور 128 جی بی اسٹوریج دی گئی ہے جس میں مائیکرو ایس ڈی کارڈ سے مزید اضافہ کیا جاسکتا ہے۔

فون میں فائلز شیئر کرنے کے 2 نئے طریقے بھی دیئے گئے ہیں، وائی فائی ڈائریکٹ سے دیگر گلیکسی فونز میں یا ہر ایک کے لیے 24 گھنٹے کا ڈاؤن لوڈ لنک بنا کر ایسا کیا جاسکے گا۔

4000 ایم اے ایچ بیٹری 25 واٹس فاسٹ چارجنگ سپورٹ کے ساتھ ہے جبکہ اینڈرائیڈ 10 آپریٹنگ سسٹم دیا گیا ہے جس کا امتزاج کمپنی نے اپنے ون یو آئی 2 یوزر انٹرفیس سے کیا ہے۔

اس فون میں بیک پر 3 کیمرے دیئے گئے ہیں جن میں سے ایک 12 میگا پکسل وائیڈ کیمرا ایف 1.8 آپرچر کے ساتھ، 12 میگا پکسل الٹرا وائیڈ ایف 2.2 آپرچر کے ساتھ اور تیسرا 64 میگا پکسل ٹیلی فوٹو لینس ایف 2.0 آپریچر کے ساتھ ہے۔

اس فون میں 3 ایکس ہائبرڈ آپٹک اور 30 ایکس سپر ریزولوشن زوم دیا گیا ہے جبکہ فرنٹ پر 10 میگا پکسل کیمرا موجود ہے۔

یہ فون بیک وقت ویڈیوز اور 10 تصاویر بیک وقت کھینچ سکتا ہے، 8 کے ویڈیو ریکارڈنگ اور ایڈیٹنگ کے ساتھ ویڈیو اسٹیبلائزیشن کو بہتر بنایا گیا ہے۔

گلیکسی ایس 20 پلس

اس فون میں 6.7 انچ کا او ایل ای ڈی ڈسپلے ریفریش ریٹ 120 ہرٹز کے ساتھ دیا گیا ہے۔

اس فون میں بھی فائیو جی سپورٹ (لو بینڈ اور ملی میٹر ویو) دی گئی ہے اور 12 جی بی ریم کے ساتھ 128 جی بی ، 256 جی بی اور 256 جی بی اسٹوریج کے آپشن دیئے گئے ہیں، جس میں مائیکرو ایس ڈی کارڈ سے مزید اضافہ کیا جاسکتا ہے۔

فون میں فائلز شیئر کرنے کے 2 نئے طریقے بھی دیئے گئے ہیں وائی فائی ڈائریکٹ سے دیگر گلیکسی فونز میں یا ہر ایک کے لیے 24 گھنٹے کا ڈاون لوڈ لنک بناکر ایسا کیا جاسکے گا۔

اسنیپ ڈراگون 865 پراسیسر اور 4500 ایم اے ایچ بیٹری 25 واٹ فاسٹ چارجنگ سپورٹ کے ساتھ موجود ہے۔

اینڈرائیڈ 10 آپریٹنگ سسٹم کا امتزاج کمپنی نے اپنے ون یوآئی 2 یوزر انٹرفیس سے کیا ہے۔

اس فون کے بیک پر 4 کیمرے موجود ہیں جس میں 12 میگا پکسل وائیڈ کیمرا ایف 1.8 آپرچر کے ساتھ، 64 میگا پکسل ٹیلی فوٹو کیمرا ایف 2.0 آپرچر کے ساتھ، 12 میگا پکسل الٹرا وائیڈ کیمرا ایف 2.2 آپرچر کے ساتھ اور 0.3 میگا پکسل ٹی او ایف تھری ڈی کیمرا شامل ہیں۔

اس فون میں 3 ایکس ہائبرڈ آپٹک اور 30 ایکس سپر ریزولوشن زوم کے ساتھ ڈیپتھ آف فیلڈ فیچر بھی دیا گیا ہے۔

فون کے فرنٹ پر10 میگا پکسل کیمرا موجود ہے اور یہ بھی 8 کے ویڈیو ریکارڈنگ اور ایڈیٹنگ کی صلاحیت رکھتا ہے۔

گلیکسی ایس 20 الٹرا

یہ بنیادی طور پر ان تینوں میں فیچرز کے لحاظ سے سب سے بہترین فون ہے جس میں 6.9 انچ او ایل ای ڈی کواڈ ایچ ڈی پلس ڈسپلے 120 ہرٹز ریفریش کے ساتھ دیا گیا ہے۔

فون میں اسنیپ ڈراگون 865 یا ایکسینوس 990 پراسیسر، 12 سے 16 جی بی ریم اور 128 جی بی، 256 جی بی اور 512 جی بی اسٹوریج کے آپشن دیئے گئے ہیں، جس میں ایس ڈی کارڈ سے اضافہ کیا جاسکتا ہے۔

درحقیقت یہ دنیا کا پہلا اسمارٹ فون ہے جس میں 16 جی بی ریم دی گئی ہے۔

اس فون میں بھی فائیو جی سپورٹ (لو بینڈ اور ملی میٹر ویو) دی گئی ہے اور فائلز شیئر کرنے کے دونوں نئے طریقے بھی اس میں موجود ہیں۔

5000 ایم اے ایچ بیٹری 45 واٹ فاسٹ چارجنگ سپورٹ کے ساتھ ہے اور کمپنی کے مطابق یہ صفر سے سو فیصد تک 74 منٹ تک چارج ہوسکتی ہے۔

اینڈرائیڈ 10 آپریٹنگ سسٹم کا امتزاج کمپنی نے اپنے ون یوآئی 2 یوزر انٹرفیس سے کیا ہے۔

اس فون کے بیک پر 4 کیمروں کا سیٹ اپ موجود ہے اور 108 میگا پکسل وائیڈ کیمرا ایف 1.8 آپرچر کے ساتھ دیا گیا ہے، اس کے علاوہ 48 میگا پکسل ٹیلی فوٹو کیمرا ایف 3.6 آپرچر کے ساتھ، 12 میگا پکسل الٹرا وائیڈ کیمرا ایف 2.2 آپرچر کے ساتھ اور 0.3 میگا پکسل ٹی او ایف تھری ڈی کیمرا دیا گیا ہے۔

فون میں 8 کے ڈوئل ویڈیو ریکارڈنگ کی جاسکتی ہے۔

فون کے فرنٹ پر 40 میگا پکسل کیمرا موجود ہے اور یہ دنیا کا پہلا فون ہے جس میں 40 میگا پکسل سیلفی کیمرا دیا گیا ہے۔

پری آرڈر قیمت

8 جی بی ریم اور 128 جی بی اسٹوریج والے گلیکسی ایس 20 کی قیمت ایک لاکھ 64 ہزار 999 روپے رکھی گئی ہے اور پری آرڈر پر اسمارٹ بینڈ اور ٹرائی پوڈ مفت دیئے جائیں گے۔

8 جی بی ریم اور 128 جی بی اسٹوریج والے گلیکسی ایس 20 پلس کی قیمت ایک لاکھ 84 ہزار 999 روپے ہے جس کے پری آرڈر پر اسمارٹ بینڈ، وائرلیس بیٹری پیک اور ٹرائی پوڈ مفت دیئے جائیں گے۔

12 جی بی ریم اور 128 جی بی اسٹوریج والا گلیکسی ایس 20 الٹرا 2 لاکھ 19 ہزار 999 روپے میں دستیاب ہوگا اور اس کے پری آرڈر پر اسمارٹ بینڈ، گلیکسی بڈز پلس اور ٹرائی پوڈ دیئے جائیں گے۔

یہ فونز سام سنگ پاکستان کی ویب سائٹ یا دیگر آن لائن سائٹس پر پری آرڈر پر بک کرائے جاسکتے ہیں جبکہ مارچ میں کسی وقت صارفین کو مل سکیں گے۔