پاکستان اور انگلینڈ کے درمیان تیسرا ٹیسٹ میچ ڈرا ہو گیا اور انگلینڈ نے سیریز 0-1 سے اپنے نام کر لی۔

انگلینڈ نے 128 رنز پر 4 وکٹیں گرنے کے بعد جوز بٹلر اور زیک کرالی کی عمدہ شراکت کی بدولت 8 وکٹوں کے نقصان پر 583 رنز بنا کر اننگز ڈکلیئر کردی تھی، کرالی نے 267 اور بٹلر نے 152رنز بنائے۔

جواب میں اظہر علی کی ناقابل شکست 141 رنز کی اننگز کے باوجود پاکستانی ٹیم پہلی اننگز میں 273 رنز بنا کر آؤٹ ہو گئی اور فالو آن کا شکار ہو گئی۔

میچ بارش کے باعث متاثر ہوا جس کی بدولت پاکستان کو شکست سے بچنے میں مدد ملی اور جب دونوں ٹیموں کی باہمی رضامندی سے پانچویں دن میچ ختم کیا گیا تو پاکستان نے 4 وکٹوں کے نقصان پر 187 رنز بنائے تھے۔

میچ میں انگلینڈ کے مایہ ناز فاسٹ باؤلر جیمز اینڈرسن نے 600 وکٹوں کا سنگ میل بھی عبور کر لیا اور یہ اعزاز حاصل کرنے والے دنیا کے پہلے فاسٹ باؤلر اور مجموعی طور پر چوتھے کھلاڑی بن گئے۔