پاکستان سپر لیگ (پی ایس ایل) 2021 کے 9ویں اور 10ویں میچ میں بالترتیب کراچی کنگز اور پشاور زلمی نے شان دار کھیل کا مظاہرہ کرتے ہوئے اپنے اپنے میچز باآسانی جیت کر پوائنٹس ٹیبل پر اپنا راج برقرار رکھا۔

نیشنل اسٹیڈیم کراچی میں 27 فروری کو پی ایس ایل کے 2 میچ کھیلے گئے جہاں پہلے میچ میں ملتان سلطانز نے پہلے کھیلتے ہوئے ایونٹ کے بڑے اسکور میں سے ایک 195 رنز بنائے، جس میں جیمز وینس کے 45 اور محمد رضوان کے 43 رنز شامل تھے۔

کراچی کنگز نے بابر اعظم کی زبردست بیٹنگ کی مدد سے باآسانی 18ویں اوور کی پانچویں گیند پر 198 رنز بنا کر 7 وکٹوں سے کامیابی حاصل کی۔

بابر اعظم نے ناقابل شکست 90 رنز کی اننگز کھیلی اورجو کلارک نے 26 گیندوں پر 54 رنز بنائے۔

دوسرے میچ میں پشاور زلمی اور اسلام آباد یونائیٹڈ کا ٹاکرا تھا جہاں وہاب ریاض نے ٹاس جیت کر پہلے فیلڈنگ کا فیصلہ کیا اور خود بہترین کھیل پیش کیا۔

وہاب ریاض نے 4 اوورز میں 17 رنز دے کر 4 وکٹیں حاصل کیں اور یونائیٹڈ کی بیٹنگ لائن کو پہلے اوور سے ہی لڑکھڑا دیا۔

اسلام آباد یونائیٹڈ کی پوری ٹیم 118 رنز بنا کر آؤٹ ہوئی، جس کے جواب میں حسن علی نے بھی پہلے اوور میں امام الحق کو صفر پر آؤٹ کیا جبکہ محمد وسیم نے کامران اکمل کی وکٹ ہتھیا لی لیکن شعیب ملک اور کوہلر نے محتاط بیٹنگ کی جبکہ حیدر علی نے جارحانہ 36 رنز بنائے۔

پشاور زلمی نے 17 گیندیں قبل ہی 4 وکٹوں پر 118 رنزبنا کر 6 وکٹوں سے میچ جیت لیا اورپوائنٹس ٹیبل پر بھی پہلی پوزیشن حاصل کرلی۔