اربوں روپے کی ٹیکس چوری، تمباکو کے شعبے کے خصوصی آڈٹ کا حکم

اپ ڈیٹ 18 اگست 2022
پبلک اکاؤنٹس کمیٹی نے تمباکو کے شعبے کے مکمل آڈٹ کا حکم دے دیا— فائل فوٹو: اے ایف پی
پبلک اکاؤنٹس کمیٹی نے تمباکو کے شعبے کے مکمل آڈٹ کا حکم دے دیا— فائل فوٹو: اے ایف پی

پبلک اکاؤنٹس کمیٹی نے آٹو مینوفیکچرنگ اور تمباکو کے شعبے کے خصوصی آڈٹ کا حکم دیا اور کہا کہ تمباکو کے شعبے میں اربوں روپے کی ٹیکس چوری ہوئی ہے۔

ڈان اخبار کی رپورٹ کے مطابق پبلک اکاؤنٹس کمیٹی کے چیئرمین نور عالم خان کی زیر صدارت کمیٹی کے اجلاس میں آٹو مینوفیکچررز کے ٹیکس کی تفصیلات اور ان کی آڈٹ رپورٹس طلب کی گئیں۔

مزید پڑھیں: تمباکو نوشی سے متعلق سنگین ہوتا مسئلہ: پاکستان سالانہ کتنے ٹیکس سے محروم ہورہا ہے؟

پبلک اکاؤنٹس کمیٹی کے چیئرمین نے آڈیٹر جنرل سے اسلام آباد ہائی کورٹ کی خصوصی آڈٹ رپورٹ کے بارے میں استفسار کیا۔

آڈیٹر جنرل نے کمیٹی کو بتایا کہ رپورٹ کو حتمی شکل دے دی گئی ہے اور اسے جلد ایوان میں پیش کیا جائے گا۔

پبلک اکاؤنٹس کمیٹی نے وزارت خارجہ کے آڈٹ پیراز کا بھی جائزہ لیا۔

آڈیٹرز نے کمیٹی کو بتایا کہ لندن ہائی کمیشن نے حیدرآباد فنڈ کیس میں ایک قانونی فرم کو 50 لاکھ پاؤنڈز دیے تھے۔

ان کا کہنا تھا کہ انگلینڈ اور ویلز کی ہائی کورٹ نے سات دہائیوں پرانے حیدرآباد فنڈ کیس میں پاکستان کے ساڑھے تین کروڑ پاؤنڈ کے دعوے کو مسترد کر دیا تھا اور ہندوستان اور نواب عثمان علی خان بہادر کے پوتے نظام VII کے حق میں فیصلہ دیا تھا۔

یہ بھی پڑھیں: حکومت سے صحت سے متعلق ٹیکس کو قومی بجٹ میں شامل کرنے کا مطالبہ

نور عالم خان نے دہائیوں پرانے آڈٹ پیرا کو جاری رکھنے پر حیرت کا اظہار کیا اور اس مناسبت سے یہ معاملہ حل کیا۔

کمیٹی نے خودمختار اداروں اور پبلک سیکٹر کمپنیوں میں کام کرنے والے اہلکاروں کے مراعات اور مراعات کا بھی جائزہ لیا اور حکومت کو تجویز دی کہ وہ ان افسران سے چھٹکارا حاصل کرے جو بھاری تنخواہیں اور مراعات لے رہے ہیں۔

پبلک اکاؤنٹس کمیٹی کے چیئرمین نے آڈیٹر جنرل کو وزارت قانون کے ساتھ ساتھ دیگر وزارتوں اور سرکاری محکموں کی کارکردگی کا آڈٹ کرنے کی بھی ہدایت کی۔

تبصرے (0) بند ہیں