پاکستان نے نیدرلینڈز کو دوسرے ون ڈے میں باآسانی 7 وکٹوں سے شکست دے کر تین میچوں کی سیریز میں 0-2 کی فیصلہ کن برتری حاصل کرلی۔

روٹرڈیم میں کھیلے گئے کرکٹ ورلڈ کپ سیریز کے دوسرے ون ڈے میچ میں نیدرلینڈز کے کپتان اسکاٹ ایڈورڈز نے ٹاس جیت کر پہلے اپنے بلے بازوں کو آزمانے کا فیصلہ کیا جو درست ثابت نہیں ہوا۔

نیدرلینڈز نے بیٹنگ کا آغاز کیا تو نسیم شاہ اور حارث رؤف نے ابتدائی اوورز میں ہی دونوں اوپنرز وکرم جیت سنگھ اور میکس او ڈووڈ کو 2 کے مجموعے پر آؤٹ کردیا۔

میزبان ٹیم کے دونوں اوپنرز ایک، ایک رن بنا کر آؤٹ ہوئے، جس کے بعد ویسلے بریسی کو بھی نسیم شاہ نے پویلین بھیجا، جنہوں نے 3 رنز بنائے۔

نیدرلینڈز کے بیس ڈی لیڈز اور ٹم کوپر نے ایک مرتبہ پھر اچھی بیٹنگ کی اور اپنی ٹیم کو مکمل طور پر تباہی سے بچاتے ہوئے 109 رنز کی شراکت قائم کی اور اسکور 117 رنز پہنچا دیا۔

ٹم کوپر 66 رنز بنا کر آؤٹ ہوئے، جس میں 7 چوکے اور 2 چھکے شامل تھے، انہیں محمد نواز نے آؤٹ کیا۔

کپتان اسکاٹ ایڈورڈ پچھلے میچ کی طرح کارکردگی نہیں دکھا پائے اور صرف 5 رنز بنا کر محمد نواز کو وکٹ دے گئے، جس کے بعد وکٹیں گرنے کا سلسلہ شروع ہوا۔

بیس ڈی لیڈز ایک اینڈ پر ڈٹے رہے لیکن دوسرے اینڈ سے ٹیجا نیڈامنارو اور ٹیم پرینگل صفر پر آؤٹ ہوئے تاہم لوگان وی ریک نے 13 رنز بنائے۔

پاکستانی باؤلرز کے خلاف 120 گیندوں کا سامنا کرتے ہوئے بیس ڈی لیڈز نے 2 چوکوں اور 3 چھکوں کی مدد سے 89 رنز بنائے اور حارث رؤف کی وکٹ بنے۔

نیدرلینڈز کی پوری ٹیم 45ویں اوور کی پہلی گیند پر 186 رنز بنا کر آؤٹ ہوئی۔

حارث رؤف اور محمد نواز نے 3،3 وکٹیں حاصل کیں۔

پاکستان کو ایک آسان ہدف کے تعاقب میں شروع میں یکے بعد دیگر نقصان اٹھانا پڑا اور دونوں اوپنرز چوتھے اوورز میں 11 کے اسکور پر پویلین لوٹ گئے۔

فخرزمان آؤٹ ہونے والے پہلے بلے باز تھے، جو 10 گیندوں پر 3 رنز اور امام الحق 10 گیندوں پر 6 رنز بنا کر کنگما کا نشانہ بنے۔

کپتان بابراعظم نے محمد رضوان کے ساتھ مل کر دوسری وکٹ پر اسکور 99 رنز تک پہنچایا اور نصف سنچری مکمل کرنے کے بعد 57 رنز بنا کر آؤٹ ہوئے۔

محمد رضوان اور آغا سلمان نے مزید کوئی وکٹ گرنے نہیں دی اور اپنی نصف سنچریوں کی مدد سے تین وکٹوں پر 191 رنز بنا کر ٹیم کو باآسانی 34 ویں اوور کی چوتھی گیند پر 7 وکٹوں سے فتح دلائی۔

اس ناقابل شکست 92 رنز کی شراکت کے دوران محمد رضوان نے ون ڈے کرکٹ میں اپنے کیریئر کی چھٹی نصف سنچری بنائی اور اپنے ایک ہزار رنز بھی مکمل کرلیے.

آغا سلمان نے 35 گیندوں کا سامنا کیا، 5 چوکوں اور 2 چھکوں کی مدد سے 50 رنز بنائے جبکہ محمد رضوان نے 82 گیندوں کا سامنا کرکے 6 چوکوں اور ایک چھکے کی مدد سے ناقابل شکست 69 رنز بنائے۔

پاکستان نے 3 وکٹوں پر 191 رنز بنا کر 7 وکٹوں سے کامیابی کے ساتھ سیریز بھی اپنے نام کرلی۔

محمد نواز کو اچھی باؤلنگ کی بدولت میچ کا بہترین کھلاڑی قرار دیا گیا۔

اس سے قبل میچ کے لیے دونوں ٹیموں میں کوئی تبدیلی نہیں کی گئی تھی اور سابقہ میچ کی فائنل الیون کو برقرار رکھا گیا تھا۔

یاد رہے کہ سیریز کے پہلے میچ میں پاکستان نے فخر زمان کی سنچری کی بدولت میزبان ٹیم کو 16 رنز سے شکست دی تھی۔

مزید پڑھیں: نیدرلینڈز کا 314 رنز کے تعاقب میں بھرپور جواب، پاکستان صرف 16 رنز سے کامیاب

سیریز کے پہلے میچ میں پاکستان نے پہلے بیٹنگ کرتے ہوئے فخر زمان کی سنچری اور کپتان بابر اعظم کی 74 رنز کی اننگز کے ساتھ ساتھ شاداب خان کے برق رفتار 48 رنز کی بدولت 6 وکٹوں کے نقصان پر 316 رنز بنائے تھے۔

جواب میں نیدرلینڈز نے بھی ناتجربہ کار پاکستانی باؤلنگ اٹیک کا فائدہ اٹھاتے ہوئے بھرپور مزاحمت دکھائی اور وکرم جیت سنگھ، ٹام کوپر اور اسکاٹ ایڈورڈز نے نصف سنچریاں بنائیں لیکن میزبان ٹیم ہدف کے تعاقب میں 300 رنز ہی بنا سکی تھی۔

سیریز کا تیسرا اور آخری ون ڈے میچ 21 اگست کو کھیلا جائے گا۔