جمیل احمد گورنر اسٹیٹ بینک مقرر، نوٹی فکیشن جاری

اپ ڈیٹ 19 اگست 2022
جمیل احمد اس سے قبل مرکزی بینک کے ڈپٹی گورنر کے طور پر بھی خدمات سر انجام دے چکے ہیں —فائل فوٹو: اسٹیٹ بینک
جمیل احمد اس سے قبل مرکزی بینک کے ڈپٹی گورنر کے طور پر بھی خدمات سر انجام دے چکے ہیں —فائل فوٹو: اسٹیٹ بینک

وفاقی حکومت نے جمیل احمد کو 5 سال کے لیے اسٹیٹ بینک آف پاکستان (ایس بی پی) کا گورنر مقرر کردیا۔

فنانس ڈویژن کی جانب سے جاری کردہ نوٹی فکیشن میں کہا گیا ہے کہ جمیل احمد کو وفاقی حکومت کی سفارش پر صدر پاکستان کی منظوری سے 5 سال کی مدت کے لیے گورنر اسٹیٹ بینک آف پاکستان تعینات کیا گیا ہے۔

26 سال سے زیادہ کا تجربہ رکھنے والے جمیل احمد ایک ماہر بینکر ہیں، وہ اس سے قبل مرکزی بینک کے ڈپٹی گورنر کے طور پر بھی خدمات سرانجام دے چکے ہیں۔

یہ بھی پڑھیں: ڈاکٹر رضا باقر کی تین سالہ مدت ملازمت تمام ہوگئی، مفتاح اسمٰعیل

وفاقی وزیر خزانہ مفتاح اسمٰعیل نے جمیل احمد کو ان کی تعیناتی پر مبارکباد دی۔

جمیل احمد سے قبل عہدے پر تعینات رہنے والے ڈاکٹر رضا باقر کی 3 سالہ مدت رواں سال 4 مئی کو ختم ہو گئی تھی، جس کے بعد ڈاکٹر مرتضیٰ سید نے قائم مقام گورنر اسٹیٹ بینک کا عہدہ سنبھالا تھا۔

جمیل احمد نے 11 اپریل 2017 سے 15 اکتوبر 2018 تک اسٹیٹ بینک کے ڈپٹی گورنر (بینکنگ اور ایف ایم آر ایم) کے طور پر خدمات سرانجام دی تھیں۔

مزید پڑھیں: 'آئی ایم ایف' کے ڈاکٹر رضا باقر اسٹیٹ بینک کے نئے گورنر مقرر

بطور ڈپٹی گورنر اسٹیٹ بینک تعینات ہونے سے قبل انہوں نے آپریشنز، بینکنگ پالیسی اینڈ ریگولیشنز ڈپارٹمنٹ، ڈیولپمنٹ فنانس ڈپارٹمنٹ اور فنانشل ریسورس مینجمنٹ ڈپارٹمنٹ گروپ ہیڈ کے طور پر بھی خدمات انجام دیں۔

وہ سعودی عربین مانیٹری ایجنسی (سما) کے لیے بھی کام کر چکے ہیں۔

مرکزی بینک کی ویب سائٹ کے مطابق انہوں نے پاکستان اور سعودی عرب کے بینکنگ سسٹمز کی پالیسی، ریگولیٹری فریم ورک کی تشکیل اور ان کے مالی استحکام کی نگرانی میں نمایاں کردار ادا کیا۔

انہوں نے پاکستان میں الیکٹرانک منی انسٹی ٹیوشنز کے لیے ضوابط کی تشکیل اور اجرا کے عمل کی نگرانی کی۔

یہ بھی پڑھیں: معیشت درست سمت میں ہے، منفی تجزیے درست نہیں، قائم مقام گورنر اسٹیٹ بینک

نئے تعینات ہونے والے گورنر اسٹیٹ بینک نے فوری ادائیگیوں کے نظام 'راست'، ڈیجیٹل بینکنگ کے ضوابط اور اسٹیٹ بینک کے نالج مینجمنٹ سسٹم کے نفاذ کے لیے قائم اسٹیئرنگ کمیٹیوں کے چیئرمین کے طور پر بھی خدمات انجام دیں۔

جمیل احمد نے ایس بی پی اور ورلڈ بینک کی جانب سے مشترکہ تیار کی گئی پاکستان کی قومی ادائیگی کے نظام کی حکمت عملی کی تشکیل اور اجرا کے عمل کی بھی نگرانی کی۔

نئے تعینات ہونے والے گورنر اسٹیٹ بینک جمیل احمد نے 1988 میں پنجاب یونیورسٹی سے ایم بی اے مکمل کیا تھا۔

وہ 1994 سے انسٹی ٹیوٹ آف کاسٹ اینڈ مینجمنٹ اکاؤنٹنٹس آف پاکستان کے فیلو ممبر، 1993 سے انسٹی ٹیوٹ آف بینکرز پاکستان کے فیلو ممبر اور 1992 سے فیلو ممبر انسٹی ٹیوٹ آف کارپوریٹ سیکریٹریز آف پاکستان ہیں۔

تبصرے (0) بند ہیں