پاکستان سپر لیگ کے آٹھویں ایڈیشن کے فائنل میں لاہور قلندرز نے اپنے اعزاز کا کامیابی سے دفاع کرتے ہوئے فائنل میں ملتان سلطانز کو سنسنی خیز مقابلے میں ایک رن سے شکست دے کر چیمپیئن بننے کا اعزاز حاصل کر لیا۔

ٹاس جیت کر پہلے بیٹنگ کرتے ہوئے قلندرز نے 112 رنز پر پانچ وکٹیں گرنے کے باوجود کپتان شاہین شاہ آفریدی کی جارحانہ بیٹنگ اور عبداللہ شفیق کی نصف سنچری کی بدولت 6 وکٹوں کے نقصان پر 200 رنز بنائے۔

ہدف کے تعاقب میں سلطانز نے ایک موقع پر رائلی روسو کی سنچری اور محمدرضوان کے 34 رنز کی بدولت ایک وکٹ پر 105 رنز بنا لیے تھے لیکن راشد خان دونوں کھلاڑیوں کو چلتا کر کے اپنی ٹیم کو میچ میں واپس لے آئے۔

اتار چڑھاؤ سے بھرپور اس سنسنی خیز مقابلے میں اختتامی اووررز میں خوشدل اور عباس آفریدی نے جارحانہ بیٹنگ کی لیکن اس کے باوجود لاہور قلندرز نے ایک رن سے فتح حاصل کر کے لگاتار دوسری مرتبہ چیمپیئن بننے کا اعزاز حاصل کر لیا۔