سابق وزیر اعظم اور پاکستان تحریک انصاف (پی ٹی آئی) کے چیئرمین عمران خان کی کرپشن الزامات میں غیر متوقع گرفتاری کے بعد ان کے حامیوں میں شدید غم و غصہ پایا جاتا ہے جبکہ پارٹی کے وفاداروں اور قانون نافذ کرنے والے اہلکاروں کے درمیان ممکنہ جھڑپوں کے بارے میں خدشات بڑھ رہے ہیں۔

پی ٹی آئی کے چیئرمین کو قومی احتساب بیورو (نیب) نے منگل کو القادر ٹرسٹ کیس میں اس وقت گرفتار کیا تھا جب وہ اسلام آباد ہائی کورٹ میں موجود تھے، جس کے نتیجے میں ملک کے مختلف شہروں میں سابق وزیر اعظم کے حامیوں کے ساتھ پولیس کی جھڑپیں جاری ہیں۔