ڈان نیوز حیدر آباد کے علاقے لطیف آباد نمبر سات میں نامعلوم ملزمان نے تھانہ اے سیکشن کی موبائل پر اندھا دھند فائرنگ کردی جس میں چار پولیس اہلکار زخمی ہوگئے۔

چاروں اہلکاروں کو زخمی حالت میں ہسپتال منتقل کیا گیا مگر ان میں سے تین دوران علاج ہلاک ہو گئے جبکہ ایک زخمی اہلکار کی حالت تشویشناک بتائی جاتی ہے۔

فائرنگ کے وقت تینوں اہلکاروں نے بچاؤ کے لئے فراہم کی گئی بلٹ پروف جیکٹ پہننے کے بجائے موبائل میں رکھی ہوئی تھی۔

ڈی آئی جی حیدرآباد ثنا اللہ عباسی نے کہا ہے کہ پولیس اہلکاروں پر حملہ شمالی وزیرستان میں جاری آپریشن ضربِ عضب کا ردعمل ہو سکتا ہے۔

وزیراعلیٰ سندھ قائم علی شاہ نے حیدرآباد میں پولیس پر فائرنگ کی مذمت کرتے ہوئے رپورٹ طلب کر لی ہے اور واقعے کے ذمہ داروں کو فوری طور پر گرفتار کرنے کے احکامات جاری کیے ہیں۔