طاہر القادری کا کہنا تھا کہ ہم فوج کو دعوت نہیں دے رہے، ملک میں مارشل لاء نہیں آئے گا، موجودہ حکمرانوں نے آئین معطل کر رکھا ہے ان پر بھی آرٹیکل چھ لاگو ہوتا ہے۔

پاکستان عوامی تحریک کے سربراہ نے اسلام آباد میں ذرائع ابلاغ کے نمائندوں سے ملاقات میں غیر رسمی گفتگو کرتے ہوئے کہا کہ ان کا جنرل راحیل سمیت کسی جنرل سے رابطہ ہے نا تھا اور انقلاب کی جدوجہد میں فوج شریک نہیں ہے۔

ان کا مزید کہنا تھا کہ انقلاب آنے سے کوئی نہِیں روک سکتا، نہ وہ فوج کو دعوت دے رہے ہیں نہ ہی وہ آئے گی۔ انقلاب کے لیے کسی سے مذاکرات نہیں ہوں گے اور نہ ہی واپسی ہوگی، انقلاب کے بعد کیا صورتحال پیدا ہوگی یہ وقت ہی بتائے گا۔

طاہر القادری کا کہنا تھا کہ دہری شہریت کا مسئلہ ہے تو پارلیمنٹ میں اسے غیر قانونی قرار دے دیا جائے، عوام کو اقتدار کی منتقلی کے لیے کسی ادارے کو درخواست نہیں کریں گے، حکمران میرٹ پر مقابلہ نہیں کرسکتے۔

انہوں نے پنجاب کے وزیر اعلی پر تنقید کرتے ہوئے کہا کہ شہباز شریف نے اب تک سانحہ ماڈل ٹاون پر ایف آئی آر درج ہونے نہیں دی۔