آئی ایس پی آر کے مطابق آرمی چیف جنرل راحیل شریف میرعلی کے دورے کے بعد بنوں پہنچ گئے جہاں انہوں نے بکاخیل میں آئی ڈی پیز کیمپ کا دورہ کیا۔

آرمی چیف نے کہا کہ شمالی وزیرستان میں آپریشن کے باعث نقل مکانی کرنے والوں(آئی ڈی پیز) کو جلد اپنے گھروں کو واپسی کی اجازت دے دیں گے۔

راحیل شریف نے کہا ہے کہ آئی ڈی پیز نے اپنے گھر بار چھوڑ کر بڑی قربانی دی ہے اور ان کی قربانیوں کو فراموش نہیں کریں گے۔

انہوں نے آئی ڈی پیز کے لیے فراہم کی جانے والی سہولیات کا جائزہ لیا اور حکام کو ہدایت کی کہ آئی ڈی پیز کو ہر ممکن سہولت اور تعاون فراہم کیا جائے۔

اس سے قبل جنرل راحیل شریف شمالی وزیرستان میں آپریشن ضرب عضب میں مصروف جوانوں کے ساتھ یوم دفاع پاکستان منانے کے لیے پہنچے۔

ڈی جی آئی ایس پی آر عاصم سلیم باجوہ کے مطابق ہفتے کو آرمی چیف جنرل راحیل شریف شمالی وزیرستان کے علاقے میرعلی پہنچ گئے، جہاں وہ آج کا دن شمالی وزیرستان میں فوجی دستوں کے ہمراہ گزاریں گے۔

اس موقع پر آرمی چیف جنرل راحیل شریف کا کہنا تھا کہ شمالی وزیرستان کو دہشت گردوں سے پاک کرکے چھوڑیں گے۔

ان کا کہنا تھا کہ آپریشن ضربِ عضب میں پاک فوج کا کردار قابل تحسین ہے۔

یاد رہے کہ شمالی وزیرستان کی تحصیل میرعلی کو گزشتہ ہفتے دہشت گردوں سے کلئیر کیا گیا تھا۔