ڈان نیوز کے مطابق الطاف حسین نےقربانی کی کھالیں جمع کرنے والے رہنماوں اورکارکنوں سےخدمت خلق فاونڈیشن میں ٹیلی فونک خطاب کرتے ہوئےکہاکہ ٹاک شوز میں تماشا لگایاہواتھا کہ ایم کیوایم گروپ بندیوں کاشکار اورکمزور ہوگئی ہے، ٹاک شوز میں تجزیہ پیش کرنے کے بجائے فیصلہ سنانے لگتےہیں۔

متحدہ کے قائد نے تجزیہ کاروں سے سوال کیاکہ اگر متحدہ کمزور ہوئی ہے تو قربانی کی کھالیں جمع کرنے کاچھتیس سالہ ریکارڈ کس طرح ٹوٹ گیا۔

الطاف حسین نے ٹاک شوز میں موقف پیش نہ کرنے پر پارٹی رہنماوں کو بھی تنقید کانشانہ بنایا۔

الطاف حسین نے ایک بارپھر نئے صوبوں کا مطالبہ کرتے ہوئے کہاکہ ملک کی ترقی کے لئے نئے انتظامی یونٹس کا قیام ضروری ہے۔

انہوں نے پاک ہندوستان سرحدی کشیدگی کا ذکر کرتے ہوئے کہا کہ جنگ دونوں ملکوں کے مفاد میں نہیں، مل بیٹھ کر بات کریں اسی میں بقا ہے۔