کراچی میں پیپلز پارٹی کے اتوار کو ہونے والے جلسے کی تیاریوں کا جائزہ لینے کے سلسلے میں دورے کے موقع پر صحافیوں سے گفتگو کرتے ہوئے خورشید شاہ کا کہنا تھا کہ مہاجر وہ ہوتے ہیں جو کیمپوں میں رہتے ہیں، ہم سب کو ساتھ رکھیں گے اور کسی کی ہندوستان واپسی نہیں چاہتے۔

انہوں نے جلسوں اور دھرنوں کو جمہوریت کا حسن قرار دیتے ہوئے کہا کہ پاکستان کی ترقی جمہوریت میں ہےجس میں ہر جماعت کو جلسوں کاحق ہے، سیاست میں کسی کوجلسہ کرنے سے نہیں روکا جاسکتا۔

کراچی جلسے کیلئے سرکاری فنڈز اور وسائل استعمال کرنے کےالزامات پر خورشید شاہ کا کہنا تھا کہ پیپلز پارٹی اپنے وسائل سے جلسہ کررہی ہے، سندھ حکومت سے کوئی فنڈز نہیں لیے۔

عمران خان کی جانب سےکرپشن کےالزام سے متعلق سوال پر خورشید شاہ کا کہنا تھاکہ تحریک انصاف کے چیئرمین کو چودہ دن کانوٹس بھیج دیا ہے، اگر میں کسی اسکینڈل میں ملوث ہوتا تو کیاصحافی مجھے چھوڑتے ۔

انہوں نے کہا کہ عمران سیاست میں نئے آئے ہیں، تب ہی ایسی باتیں کررہے ہیں۔

جلسے کی سیکورٹی کے حوالے سے ان کا کہنا تھا کہ اللہ ان کی اور ان کے رہنما بلاول بھٹو کی حفاظت کرے گا۔