فواد خان اور ماہرہ خان تو پہلے ہی بولی وڈ کی جان بن چکے ہیں، لیکن اب خبریں ہیں کہ پاکستانی اداکارہ ماورا حسین بھی ہندوستانی فلم انڈسٹری میں قدم جمانے کو تیار ہیں۔

اداکارہ نے سوشل میڈیا پر اپنے دورہ ممبئی کی کچھ تصاویر شیئر کی ہیں، جن میں انھیں جہاز میں بیٹھا ہوا، ان کا پاسپورٹ اور پھر گاڑی سے اترتے ہوئے دیکھا جاسکتا ہے۔

وی جے سے ڈرامہ ایکٹریس بننے والی ماورا حیسن نے حال ہی میں اے آر وائی ڈیجیٹل کے ڈرامے 'میں بشریٰ' میں کام کیا، جس میں فیصل قریشی کے مد مقابل ان کے کردار کو کافی سراہا گیا۔

جبکہ فلم 'نامعلوم افراد' میں بھی ماورا اپنے فن کا جادو جگا چکی ہیں۔

میڈیا رپورٹس کے مطابق ماورا کو بولی وڈ سے دو فلموں میں کام کی پیشکش کی گئی ہے اور اس حوالے سے اسکرپٹس اُن کے زیر غور ہیں تاہم ابھی انھوں نے انڈین فلم میں کام کرنے کی حامی نہیں بھری۔