سعودی وزارت داخلہ نے واقعے میں چار افراد کی ہلاکت کی تصدیق کردی ہے۔

خبر رساں ادارے اے پی نے سرکاری ایس پی اے نیوز ایجنسی کے حوالے سے بتایا کہ مسجد کے باہر سیکیورٹی فورسز کو ایک گاڑی پر شبہ ہوا۔

سیکیورٹی اہلکار گاڑی کی جانب بڑھنے لگے جس پر گاڑی میں دھماکا ہوگیا۔ ہلاک ہونے والوں میں ایک شخص کے بارے میں شبہ ظاہر کیا جارہا ہے کہ وہ اس گاڑی کا ڈرائیور تھا۔

حکام کے مطابق حملہ آور مسجد کو ہدف بنانا چاہتا تھا جس میں وہ ناکام رہے۔

دولت اسلامیہ نے اس خود کش حملے کی ذمہ داری قبول کرلی ہے۔

دوسری جانب وزیراعظم نواز شریف نے دمام میں خود کش حملے کی سختی سے مذمت کرتے ہوئے واقعے میں جانی نقصان پر افسوس کا اظہار کیا۔

عینی شاہد احمد نے رائٹرز کو بتایا کہ دھماکے کے وقت وہ اپنے اہلخانہ کے ساتھ مسجد کے قریب موجود تھے.

دھماکے کے بعد سعودی سیکیورٹی فورسز نے جائے وقوع کو گھیرے میں لے لیے اور تحقیقات کا بھی آغاز کردیا گیا ہے۔

مزید پڑھیں: سعودی عرب: مسجد میں خودکش حملہ، 20 افراد ہلاک

خیال رہے کہ گزشتہ جمعے بھی سعودی عرب کے صوبے القطیف میں ایک خود کش دھماکے کے نتیجے میں کم از کم 20 افراد ہلاک ہوگئے تھے۔

اس دھماکے کے موقع پر مسجد میں 150 سے زائد نمازی موجود تھے۔ اس کی ذمہ داری داعش نے قبول کی تھی۔