انیل کپور کا کہنا ہے کہ اداکار سلمان خان اور ان کی بیٹی اداکارہ سونم کپور ایک ساتھ بہترین نظر آتے ہیں۔

انڈین ایکسپریس کے مطابق انیل کپور کا ایک انٹرویو میں کہنا تھا کہ سلمان خان اور سونم کپور اس سے پہلے بھی ایک ساتھ کام کرچکے ہیں اور دونوں ہی پرکشش اداکار ہیں جس کی وجہ سے وہ ایک ساتھ اچھے نظر آئیں گے۔

ان کا کہنا تھا کہ امید ہے کہ دیکھنے والوں کو سونم کی فلم ’پریم رتن دھان پایو‘ کافی پسند آئے گی۔

یاد رہے کہ سلمان خان اور سونم کپور اس سے قبل سنجے لیلا بھنسالی کی فلم ’سانوریا‘ میں ایک ساتھ نظر آئے تھے۔

انیل کپور کا مزید کہنا تھا کہ فلم ’پریم رتن دھان پایو‘ کی ہدایات سورج برجاتیا دے رہے ہیں جس کی وجہ سے فلم اچھی ہوگی کیوں کہ وہ ایک بہترین ہدایت کار ہیں۔

اپنی حال ہی میں ریلیز فلم ’ویلکم بیک‘ کی کامیابی کے حوالے سے انیل کپور کا کہنا تھا کہ وہ بہت خوش ہیں کہ لوگوں کو ان کی فلم اس حد تک پسند آئی اور فلم نے پاکس آفس پر اچھی کمائی کی جو تاحال جاری ہے۔

فلم ’پریم رتن دھان پایو‘ 12 نومبر کو سنیما گھروں میں نمائش کے لیے پیش کی جائے گی۔