ننکانہ صاحب میں ماناوالہ روڈ پر ایک ٹینکر کھڑا تھا جب پیچھے سے آنے والے تیز رفتار کار اس سے ٹکرا گئی جس سے ٹینکر نے فوراََ آگ پکڑ لی.

ایل پی جی میں لگنے والی آگ کی شدت نے سے کار میں سوار 2 افراد موقع پر ہی ہلاک ہو گئے، اس دوران وہاں سے گزرنے والے رکشے کو بھی آگ نے اپنی لپیٹ میں لیا، رکشے میں اسکول جانے والے بچے سوار تھے.

آگ سے قریب کی دکانوں اور گھروں کو بھی نقصان پہنچا، شدید آگ کی اطلاع پر ریسکیو اہلکاروں کے ساتھ ساتھ فائر بریگیڈ کی گاڑیاں روانہ ہوئیں.

ننکانہ صاحب کے ریسکیو اہلکار علی نے بتایا کہ حادثے میں 12 افراد ہلاک ہوئے جبکہ 20 سے زائد زخمیوں کو ڈسٹرکٹ ہسپتال شیخوپورہ منتقل کیا گیا، جن میں سے 12 زخمیوں کی حالت تشویشناک ہونے پر فیصل آباد اور لاہور منتقل کرنے کا انتظام کیا گیا.

ریسکیو ذرائع کے مطابق آتش زدگی کے باعث رکشے میں سوار 7 بچوں کی ہلاکت ہوئی.

ریسکیو ذرائع کا کہنا تھا کہ ہلاک ہونے والوں میں 3 خواتین بھی شامل ہیں.

دوسری جانب ڈسٹرکٹ ہیلتھ افیسر شیخوپورہ ڈاکٹر اعظم کا کہنا تھا کہ حادثے میں 9 افراد کی ہلاکت ہوئی.

آگ اتنی شدید تھی کہ قریب کی دکانوں اور چند مکان بھی اس کی زد میں آئے، جن کو فائر بریگیڈ نے فوری طور پر پانی سے بجھا دیا.

وزیر اعلی پنجاب شہباز شریف نے واقع کا نوٹس لیا اور فوری طور پر مقامی انتظامیہ سے رپورٹ طلب کر لی۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔