ڈان نیوز کے مطابق راولپنڈی کے علاقے روات کے فیز سیون میں پولیس نے ایک غیر قانونی کڈنی سینٹر پر چھاپہ مارا۔

کارروائی میں گردوں کی خرید و فروخت کے مکروہ دھندے میں ملوث بین الاقوامی گروہ کے 4 ارکان کو دھر لیا گیا۔

گرفتار افراد میں 2 ڈاکٹرز، ڈرائیور اور ایجنٹ شامل ہیں۔

پولیس ذرائع کے مطابق راولپنڈی کا ایک نجی ہسپتال بھی اس غیر قانونی کاروبار میں ملوث ہے۔

انسانیت سوز دھندے میں ملوث گروہ مجبور اور غریب لوگوں کو پیسوں کا لالچ دے کر ان کے گردے نکالتا تھا، جو اندرون اور بیرون ملک فروخت کیے جاتےتھے۔

چھاپے کے دوران پولیس نے گروہ کے چنگل میں پھنسنے والی 5 خواتین سمیت 24 افراد کو بھی بازیاب کرالیا۔

کامیاب کارروائی پر سی پی او راولپنڈی نے چھاپہ مار ٹیم کے لیے انعام کا اعلان کیا ہے۔