محکمہ موسمیات کے مطابق یہ چاند عام چاند کی نسبت سائز میں 14 فیصد بڑا اور 30 فیصد زیادہ روشن، جسے پاکستان میں شام 6 بج کر 52 منٹ پر دیکھا گیا۔

برطانوی خبر رساں ادارے رائٹرز کے مطابق، 14 نومبر کے روز نظر آنے والا سپر مون 7 دہائیوں کا سب سے بڑا اور چمکدار چاند تھا،یہ آسمان و کہکشاؤں کی تسخیر کا شوق رکھنے والے افراد کے لیے ایک بہترین نظارہ رہا۔

ماہرین کے مطابق، 1948 کے بعد پہلی بار پورا چاند زمین سے اس قدر کم فاصلے پر آیا، دورانِ گردش چاند سطحِ زمین سے 3 لاکھ 48 ہزار 4 سو کلومیٹر کی حد میں آگیا، یہ فاصلہ عام طورپر زمین اور چاند کے درمیان موجود فاصلے سے تقریباً 35 ہزار 4 سو کلومیٹر کم رہا۔

اگلی بار 2034 میں ہی چاند اور زمین کے درمیان فاصلہ اس قدر کم ترین ہوگا اور تب ہی اتنا روشن سپر مون دیکھا جاسکے گا۔