وزیر اعظم نواز شریف نے کراچی ایکسپو سینٹر میں چار روزہ دفاعی نمائش کا باقاعدہ افتتاح کیا، اس موقع پر تینوں مسلح افواج کے سربراہان بھی اُن کے ہمراہ تھے۔

ڈیفنس ایکسپورٹ اینڈ پروموشن آرگنائزیشن کی جانب سے منعقدہ نمائش میں 34 ممالک کے 90 وفود شرکت کر رہے ہیں۔

اس سال دفاعی نمائش ’ہتھیار برائے امن‘ کے عنوان کے تحت منعقد کی جارہی ہے۔

نمائش میں 261 غیر ملکی جبکہ 157 قومی کمپنیاں دفاعی مصنوعات پیش کر رہی ہیں۔

جے ایف 17 تھنڈر، کے ایٹ ایئر کرافٹ، الخالد ٹینک، فاسٹ اٹیک کرافٹ میزائل بوٹ اور دیگر دفاعی ساز و سامان بھی نمائش میں رکھا گیا ہے۔

دفاعی نمائش میں 9 ممالک پہلی بار شرکت کر رہے ہیں۔

نمائش کے دوران جاری کردہ ٹریفک پلان کے مطابق مرکزی یونیورسٹی روڈ کو مسلسل کھلا رکھنے کا فیصلہ کیا گیا ہے۔

تاہم اس کے باوجود عوام کی بڑی تعداد کو گھنٹوں ٹریفک جام کی تکلیف جھیلنی پڑی اور شہری حکومتی انتظامات پر نالاں نظر آئے۔