گوگل ارتھ کے ذریعے منظر عام پر آنے والی تصویر میں اہرام مصر کی طرح کا ایک پہاڑ دکھائی دے رہا ہے اور انٹرنیٹ پر لوگوں نے اس حوالے سے کئی من گھڑت کہانیاں بنالی ہیں۔

تاہم جرمن ریسرچ سینٹر برائے جیوسائنس نے ویب سائٹ آئی ایف ایل سائنس کو بتایا کہ ’ہرم کی شکل کے پہاڑ ایلز ورتھ پہاڑی سلسلے میں موجود ہیں جو 400 کلو میٹر طویل رقبے پر پھیلا ہوا ہے لہٰذا اگر کسی پہاڑ کی چوٹی برف سے باہر نکل آئی ہے تو اس میں حیرانی کی کوئی بات نہیں‘۔

انہوں نے بتایا کہ ’پہاڑ کی چوٹی واضح طور پر چٹانوں پر مشتمل ہے اور یہ محض اتفاق ہے کہ اس کی شکل اہرام مصر سے مشابہت رکھتی ہے‘۔

انہوں نے مذکورہ پہاڑ کے انسانی ساختہ ہونے کے امکان کو رد کرتے ہوئے کہا کہ ’پہاڑوں کی تعریف کے مطابق یہ ایک نیوناٹاک قسم کا پہاڑ ہے جس کی چوٹی برف سے باہر نکل رہی ہے اور اتفاق سے یہ ہرم کی شکل کا ہے لیکن اس کا یہ مطلب نہیں کہ اسے انسانوں نے تعمیر کیا ہو‘۔

انٹرنیٹ پر ایک اور شخص نے اس پہاڑ کو عام بات قرار دیتے ہوے کہا کہ ہرم کی طرح کے پہاڑ کوئی انوکھی بات نہیں اس طرح کے پہاڑ ایلپس کے پہاڑی سلسلے اور آئس لینڈ میں دیکھے جاسکتے ہیں۔