ابتدائی رپورٹس کے مطابق ایئرفورس کا ہرکولیس سی-130 طیارہ انڈونیشیا کے صوبے پاپوا میں گر کر تباہ ہوا، طیارے کے ذریعے کھانے پینے کی اشیاء منتقل کی جا رہی تھیں جبکہ طیارے میں 3 پائلٹ اور 10 فوجی اہلکار سوار تھے۔

برطانوی خبر رساں ادارے کی رپورٹ کے مطابق ایئرفورس کے چیف آف اسٹاف آگسٹ سپریانتا نے میڈیا سے بات کرتے ہوئے بتایا کہ موسم کی خرابی کے باعث طیارہ حادثے کاشکار ہوا۔

فوجی طیارہ انڈونیشیا کے شہر ٹمیکا سے ومینا جاتے ہوئے اپنی منزل کے قریب پہاڑی علاقے میں اتوار کی صبح گرکر تباہ ہوا۔

خبر رساں ادارے رائٹرز سے بات کرتے ہوئے انڈونیشیا کے ادارے سرچ اینڈ ریسکیو آپریشنل کے ڈائریکٹر آئیون احمد رسکی ٹائٹس نے کہا کہ ملبے اور لاشوں کو ومینا منتقل کیا جا رہا ہے۔

خیال رہے کہ انڈونیشیا میں اس سے پہلے بھی فضائی حادثات ہوتے رہے ہیں، اس سے قبل گزشتہ برس جون میں بھی انڈونیشیا کی فضائیہ کا ایک طیارہ سماٹرا جزیرے کے شہر مدان کے رہائشی علاقے میں گر کر تباہ ہوا تھا، جس وجہ سے طیارے میں سوار تمام 116 افراد ہلاک ہوگئے تھے۔

رواں برس مارچ میں بھی انڈونیشیا کا ایک فوجی طیارہ وسطی علاقے سولاویسی کے ضلع پوسو کے ایک گاؤں میں گر کر تباہ ہوا تھا، جس میں سوار 13 افراد ہلاک ہوگئے تھے۔

انڈونیشیا میں فوجی طیارہ تباہ ہونے کا ایک اور واقعہ رواں برس جولائی میں پیش آیا تھا، نیشنل آرمی کا طیارہ صوبے جاوا کے مرکزی شہر یوگویاکرتا کے شمال کی طرف مضافاتی علاقے میں گر کر تباہ ہوا تھا جس کی وجہ سے 3 افراد ہلاک ہوگئے تھے۔