پاکستان نیوی کی جانب سے جاری پریس ریلیز کے مطابق ’سمندر سے سمندر میں مار کرنے والا اینٹی شِپ میزائل فائر کرنے کا مظاہرہ پی این ایس اصلت سے جنگی جہاز سورڈ کلاس سے کیا گیا۔‘

پریس ریلیز میں کہا گیا کہ ’میزائل نے کامیابی سے مطلوبہ ہدف کو انتہائی درستگی سے نشانہ بنا کر ہتھیار کے مہلک اور جارحانہ ہونے کی توثیق کی۔‘

چیف آف نیول اسٹاف ایڈمرل محمد ذکااللہ نے میزائل فائر کرنے کے تجربے کا مظاہرہ کیا اور پاک بحریہ کی آپریشنل تیاریوں پر مکمل اطمینان کا اظہار کیا۔

اس موقع پر ان کا کہنا تھا کہ ’میزائل کے براہ راست فائر کرنے سے سمندر میں اس کی قوت مزاحمت کی توثیق اور اپنی سمندری حدود کے دفاع کے لیے پاک بحریہ کی صلاحیتوں کا منہ بولتا ثبوت ہے۔‘