یہ ممکن ہے کہ آپ نے پہلے بھی نسلی اور خوبصورت گھوڑے دیکھے ہوں مگر یقیناً آپ نے دنیا کے ایسے خوبصورت ترین نسلی گھوڑے نہیں دیکھے ہوں گے۔

دنیا میں گھوڑوں کی کئی نسلیں ہیں مگر سب سے خوبصورت اور پرکشش گھوڑے ’آخال تکہ‘ نامی نسل کے ہوتے ہیں جو دنیا کے چند ممالک میں پائے جاتے ہیں، مگر ان کی زیادہ تعداد ترکمانستان میں پائی جاتی ہے،جہاں انہیں قومی نشان کی اہمیت حاصل ہے۔

ترکمانستان سے دنیا کے دیگر ممالک میں پھیلنے والی گھوڑوں کی یہ نسل سابق سوویت یونین سے آزادی حاصل کرنے والے چند ممالک سمیت کچھ یورپی اور شمالی امریکا کے ممالک میں بھی پائی جاتی ہے۔

ان گھوڑوں کو ان کی سنہری چمکیلی اور نرم کھال کی وجہ سے دنیا میں گھوڑوں کی خوبصورت ترین نسل قرار دیا جاتا ہے، مگر ترکمانستان میں موجود اس نسل کے گھوڑے دیگر ممالک میں پائے جانے والے گھوڑوں سے زیادہ خوبصورت مانے جاتے ہیں۔

اس نسل کے گھوڑوں کی جلد ہلکی سنہری اور سفیدی مائل ہونے کے باعث ان کو’ گولڈن ہارس‘ بھی کہا جاتا ہے۔

آخال تکہ کے نسلی گھوڑوں سے متعلق سائنسدانوں کا دعویٰ ہے کہ ان گھوڑوں کی جِلد میں جینیاتی طور پر روشنی کو منعکس کرنے کی صلاحیت موجود ہوتی ہے جب کہ یہ گھوڑے ہر طرح کی موسمیاتی تبدیلیوں کا سامنا کرنے کے بھی اہل ہوتے ہیں۔

دستیاب رپورٹس کے مطابق دنیا بھر میں اس نسل کے گھوڑوں کی تعداد زیادہ سے زیادہ 6 ہزار جب کہ کم سے کم 1250 کے لگ بھگ ہے۔