سینئر سپرنٹنڈنٹ پولیس (ایس ایس پی) سٹی عدیل حسین چانڈیو نے کہا کہ بلدیہ کے علاقے سے گرفتار ہونے والے ملزم کے قبضے سے مختلف اقسام کے 31 دستی بم، اسلحہ و گولہ بارود بھی برآمد ہوا۔

اپنے دفتر میں پریس کانفرنس کے دوران عدیل چانڈیو کا کہنا تھا کہ خفیہ اطلاعات کی بنیاد پر موچکو پولیس اسٹیشن کے ایس ایچ او بابر حمید نے رحمٰن ڈکیت کے بھانجے اور رحیم عرف کانا کے بیٹے شریف رحیم کو بلدیہ ٹاؤن کے علاقے رئیس گوٹھ سے گرفتار کیا۔

یہ بھی پڑھیں: کراچی: القاعدہ سے منسلک 'دہشت گرد ڈاکٹر' گرفتار

انہوں نے کہا ملزم کی معلومات پر برآمد کے جانے والے دستی بموں میں 10 دیسی ساختہ دستی بم، 8 اسٹَن گرینیڈ، 10 رائفل گرینیڈ، 3 اسموک گرینیڈ، 3 کلاشنکوف، ایک 222 رائفل، 2 نائن ایم ایم رائفلز اور 9 نائن ایم ایم پستول شامل ہیں۔

عدیل حسین چانڈیو نے دعویٰ کیا کہ موجودہ صورتحال کے پیش نظر یہ گرینیڈ لیاری اور شہر کے دیگر علاقوں میں دہشت گردی کی کارروائیوں کے لیے استعمال کیے جاسکتے تھے۔